Atyraý oblysynda joldaǵy maldan bolatyn apattar eki ese artqan
ASTANA. KAZINFORM – Atyraý oblysynyń Mahambet aýdanynda aýyl sharýashylyǵy janýarlarynyń qatysýymen bolatyn jol-kólik oqıǵalarynyń aldyn alý sharalary kúsheıtildi, dep habarlaıdy prokýratýra.
2025 jyly aýdanda aýyl sharýashylyǵy janýarlarynyń qatysýymen 7 jol-kólik oqıǵasy bolyp, 2 adam qaza tapqan jáne 14 adam jaraqat alǵan. Al bıyl 15 jol-kólik oqıǵasy tirkelip, 1 adam qaza taýyp, taǵy 2 adam jaraqattandy.
– Osyndaı oqıǵalardyń aldyn alý maqsatynda Mahambet aýdany prokýratýrasynyń bastamasymen jergilikti atqarýshy jáne ýákiletti memlekettik organdardyń qatysýymen vedomstvoaralyq jumys toby quryldy, – delingen prokýratýra habarlamasynda.
Jumys toby avtomobıl joldarynyń qaýipti ýchaskelerin tekserip, qosymsha 6 ınteraktıvti eskertý jol belgisin ornatty.
Sonymen qatar profılaktıkalyq shara aıasynda aýyl sharýashylyǵy janýarlaryna jaryq shaǵylystyratyn 300 taspa taǵý qolǵa alyndy. Mundaı taspalar júrgizýshilerge qarańǵy ýaqytta jáne kórý múmkindigi shekteýli jaǵdaıda janýarlardy der kezinde baıqaýǵa múmkindik beredi.
– Mahambet aýdany prokýratýrasy aýyl sharýashylyǵy janýarlarynyń ıelerin janýarlardy qaraýsyz jaıylymǵa jibermeýge, avtomobıl joldarynyń boıynda, ortaq paıdalanylatyn jerlerde jáne sý qorǵaý aımaqtarynda jaıýǵa jol bermeýge, sondaı-aq janýarlardy sáıkestendirip, mindetti veterınarııalyq rásimderden ýaqytyly ótkizýge shaqyrady, – dep atap ótti vedomstvodan.
Aıta keteıik, Almatyda eki kúnde jol erejesin buzýdyń 3 myń deregi tirkeldi.
