Atyraý oblysynda joǵalyp ketken 5 jasar bala káriz qudyǵynan tabyldy

Atyraý oblysynyń Isataı aýdanynda bes jasar bala káriz qudyǵyna túsip ketken. Ony taba almaǵan ata-anasy aýdandyq polıtsııa bólimine júgingen, dep habarlaıdy QazAqparat tilshisi.

Atyraý oblystyq polıtseı departamentiniń baspasóz qyzmetinen málim etkendeı, bes jasar bala keshe, 19 qyrkúıekte joǵalyp ketken.

«Aqqystaý aýylynyń turǵyny jergilikti ýaqytpen saǵat 17:48 shamasynda aýdandyq polıtsııa bólimine júginip, 20 mınýt buryn 5 jasar ulynyń joǵalyp ketkeni týraly habar berdi. Tártip saqshylary jedel izdestirý jumystaryn júrgizdi. Sol kezde balanyń daýysy turǵyn úı aýlasyndaǵy káriz qudyǵynan shyqqan. Káriz qudyǵyna túsip ketken 5 jasar aman-esen shyǵaryldy», -dep habarlady departamenttiń baspasóz qyzmeti.

Jergilikti dárigerler balaqaıǵa jan-jaqty tekserý júrgizdi.

Eske sala ketelik, buǵan deıin Atyraýda besinshi qabattan qulaǵan 4 jasar bala kóz jumǵan edi. 

Kópqabatty turǵyn úıdiń 5-qabatynan 2019 jylǵy bala qulap ketken. Balaqaı ártúrli dene jaraqatynyń saldarynan esin jımastan oqıǵa ornynda qaıtys boldy.

Belgili bolǵandaı, balaqaıdyń ata-anasy Atyraý qalasynyń Mahambet kóshesindegi kópqabatty turǵyn úıde turady.

Sondaı-aq, jyl basynan beri 7 bala joǵarǵy qabattan qulap, ekeýi mert bolǵanyn jazǵan edik.