Atyraý oblysynda jyl basynan bergi 1 aıda jol apatynan 7 adam mert bolǵan
ATYRAÝ. KAZINFORM – Atyraý oblysynda jyl basynan bergi 1 aıda jol apatynan 7 adam kóz jumǵan. Bul derek tártip saqshylaryn alańdatyp otyr.
Atyraý oblystyq jergilikti polıtsııa qyzmeti basqarmasy bastyǵynyń orynbasary Ádilbek Shahmetovtiń aıtýynsha, tártip saqshylary táýlik boıy jol qaýipsizdigin qadaǵalaýdy qolǵa alǵan.
– Júrgizýshilerge saqtyq sharalary týraly udaıy túsindirý jumysy júrgizilgenine qaramastan, jyl basynan beri jol apatynyń saldarynan 7 adam qaza tapty. Onyń ishinde jasóspirimderdiń qatysýymen bolǵan jol-kólik oqıǵasy bar. Polıtsııa departamentiniń qyzmetkerleri jol boıyndaǵy qaıǵyly jaǵdaılardyń aldyn-alý úshin profılaktıkalyq is-sharalarǵa basymdyq berip otyr, -dep habarlady Ádilbek Shahmetov.
Onyń aıtýyna qaraǵanda, joldaǵy qaýipsizdikti saqtaý maqsatynda mektepterde okýshylarmen jáne ata-analarmen jıyn ótkizilgen.
– Atyraý kalasynan 4 baǵytqa shyǵatyn tusta kólik júrgizýshilerine jol apatynyń beınerolıkteri kórsetilip, kempıngterde qaýipsizdik talaptary túsindirildi. Halyqaralyq baǵytqa qatynaıtyn aýyr júk kólikteriniń júrgizýshilerine shep beketterinen ózge oblystardaǵy qolaısyz aýa raıy, jol qozǵalysy týraly keńes berildi, - deıdi Ádilbek Shahmetov.
Sondaı-aq, Atyraý qalasynyń kóshelerinde jol apatynan jaramsyz bolyp qalǵan kólikter kórsetilgen. Jol erejesin saqtap, óziniń jáne jolaýshylardyń ómirine nemquraıly qaramaıtyn júrgizýshilerge estelik syılyqtar berilgen.
Eske sala ketelik, budan buryn Atyraý oblysynda jol apatynan 2 kóliktiń júrgizshisi men 1 jolaýshy mert bolǵanyn habarlaǵan edik.
Keıin jol apatynan 37 jastaǵy jolaýshy kóz jumǵanyn jazǵan bolatynbyz.