Atyraý oblysynda jyl basynan beri jol apatynan 89 adam mert bolǵan

Atyraý oblysynda jyl basynan beri 324 jol-kólik oqıǵasy tirkelgen. Jol apatynyń saldarynan 416 adam ár túrli dene jaraqatyn alǵan. Al, 89 adam mert bolǵan, dep habarlaıdy Kazinform.

Atyraý oblystyq PD jergilikti polıtsııa qyzmeti basqarmasynyń aǵa ınspektory, polıtsııa maıory Amanjol Jumalıevtyń málimetine súıensek, byltyrǵy kórsetkishpen salystyrǵanda, bıyl jol-kólik oqıǵasy 0,6 paıyzǵa tómendegen.

«Jol-kólik oqıǵalarynyń basym bóligi respýblıkalyq mańyzy bar tas jolda tirkelip otyr. Mundaı jolda adam óliminiń 61,8 paıyzy tirkeledi. Taldaýǵa sáıkes, bıyl 11 aıda respýblıkalyq mańyzy bar tasjolda tirkelgen jol apatynan 55 adam qaza bolǵan. Jyl basynan beri jasóspirimderdiń qatysýymen bolǵan jol-kólik oqıǵasynyń sany edáýir ósip otyr. Sol sebepten, jol apatynyń aldyn alý úshin 14 márte jedel aldyn alý is-sharasy men reıdtik aktsııa ótkizildi», - deıdi Amanjol Jumalıev.

Ákimshilik polıtsııa basqarmasynyń aǵa ınspektory, polıtsııa kapıtany Tilepbergen Aqbolatovtyń qysqy mezgilde jol apatynyń aldyn alý úshin kólik dóńgelegin mezgilinde aýystyryp turý qajet.

«Atyraý oblysynda sońǵy aıda respýblıkalyq jáne oblystyq tas jol 6 márte jabyldy. Oǵan qar aralas jańbyrdan keıingi kóktaıǵaq áser etti. Kóliktiń qozǵalysyna, júrgizýshiler men jolaýshylardyń ómirine qaýip-qater tónse, osyndaı is-shara qabyldanady. Bul talap Kedendik Odaqtyń aýmaǵynda avtokólikterdi paıdalaný erejesinde naqty kórsetilgen. Atalǵan talapty oryndaýǵa baǵynbaǵan júrgizýshilerge QR Ákimshilik quqyq buzýshylyq týraly kodeksiniń 590-babynyń 5-tarmaǵyna sáıkes 5 aılyq eseptik kórsetkish mólsherinde aıyppul salý qarastyrylǵan», -dedi Tilepbergen Aqbolatov.

Eske sala ketelik, buǵan deıin Atyraý oblysynda eki kólik soqtyǵysyp, júrgizýshi men eki jolaýshy mert bolǵanyn jazǵan edik.