Atyraý oblysynda jyl basynan beri jol apatynan 5 jasóspirim kóz jumǵan
Atyraý oblystyq jergilikti polıtsııa qyzmeti basqarmasy jol qaýipsizdigin qadaǵalaýdy uıymdastyrý tobynyń ınspektory, polıtsııa kapıtany Aıbek Álimovtiń aıtýynsha, jyl basynan beri jasóspirimderdiń qatysýymen 102 jol-kólik oqıǵasy tirkelgen.
«Atyraý oblysynyń aýmaǵynda jol apatynyń saldarynan zardap shekken jasóspirimder azaımaı otyr. Jyl basynan beri jol-kólik oqıǵasynan 5 jasóspirim kóz jumdy. Al, 124 jasóspirim ártúrli dene jaraqatyn aldy», - deıdi Aıbek Álimov.
Onyń deregine súıensek, jol-kólik oqıǵasyna sebepker bolatyn jasóspirimder bar. Olardyń kinásinen tirkelgen 17 jol apatynan 3 jetkinshek mert bolǵan. Al, 19 jasóspirim dene jaraqatynyń saldarynan zardap shekken.
«Máselen, 27 shildede saǵat 21:00 shamasynda Qyzylqoǵa aýdanyndaǵy Saǵyz aýylynda 2010 jylǵy jasóspirim mototsıkldiń rýline ıe bola almaı, túıege soqtyǵysty. Sonyń saldarynan jasóspirim oqıǵa ornynda qaza tapty. Al, 22 tamyzda Atyraý qalasynyń Kóktem shaǵyn aýdany tusynda 2008 jylǵy jasóspirim Hyundai avtokóligimen velosıped tizgindegen adamdy qaǵyp ketti. Jol-kólik oqıǵasynan 8 jasar bala túrli dene jaraqatymen aýrýhanaǵa jetkizildi», - dep málim etti Aıbek Álimov.
Polıtsııa qyzmetkerleri kólik júrgizýshilerin jol qozǵalysy erejelerin qatań saqtaýǵa shaqyryp otyr.
«Ásirese, jaıaý júrginshiler joldan ótý erejesin buzbaýy qajet. Aldaǵy aptada jańa oqý jyly bastalady. Demek, oqýshylar mektepke barý úshin jolǵa shyǵady. Osy kezde ár ata-ana balalaryna jolda júrý, arnaıy jolaqtan ótý erejesin eskertkeni jón. Júrgizýshilerdi jyldamdyqty asyrmaı, oqýshylardy jolaqtan ótkizip jiberýi kerek», - dedi Aıbek Álimov.
Eske sala ketelik, buǵan deıin Atyraýda elektrli kólik júrgizýshileri 7 aıda 930 márte jol erejesin buzǵanyn jazǵan edik.
