Atyraý oblysynda jyl basynan beri ómirge kelgen 10,5 myń sábıdiń 482-si shala týǵan

ATYRAÝ. KAZINFORM — Atyraý oblysynda jyl basynan beri 10 myń 522 sábı ómirge kelgen. Onyń ishinde shala týǵan 482 náreste bar.

Atyraý oblystyq perınataldyq ortalyǵy jansaqtaý bóliminiń neonatolog dárigeri Aslan Muqanovtyń aıtýynsha, bıyl shala týý kórsetkishi tómendegen. 

«Byltyr 11 myń 326 sábıdiń 502-si merziminen buryn dúnıege kelgen edi. Al, bıyl ómirge 10 myń 522 náreste dúnıege keldi. Onyń arasynda 482 sábıdiń shala týǵany tirkeldi. Merziminen buryn týǵan sábılerdiń kútimi erekshe bolýy qajet. Qazir perınataldyq ortalyqtyń jansaqtaý bóliminde 10-ǵa jýyq sábı jatyr. Shala týǵan náresteniń biriniń salmaǵy óte jeńil — 690 gramm», — deıdi Aslan Muqanov.

Onyń deregine qaraǵanda, perınataldyq ortalyqta 25 neonatolog bar. Olar shala týǵan nárestelerdiń densaýlyǵyn udaıy baqylaýǵa úles qosyp júr.

«Jalpy 22 aptada 500 gramm salmaqpen dúnıege kelgen sábıler shala týǵan bolyp esepteledi. Biraq, budan az salmaqpen ómirge keletin náresteler kezdesedi. Máselen, birneshe jyl buryn Atyraý oblystyq perınataldyq ortalyǵynda bir sábı jarty kelige jetpeıtin 450 gramm salmaqpen ómirge keldi. Biz náresteniń qatarǵa qosylýy úshin qoldan kelgen kómegimizdi aıamadyq. Qazir onyń jasy — 13-te», — dep málim etti Aslan Muqanov.

Eske sala ketelik, budan buryn Atyraý oblysynda úshem dúnıege kelgenin jazǵan edik. 

Sondaı-aq, Atyraý oblysynda «Ańsaǵan sábı» baǵdarlamasymen 54 ana sábı kútip júrgenin habarlaǵan bolatynbyz.