Atyraý oblysynda jyl basynan beri 686 alaıaqtyq qylmysy tirkelgen

Atyraý oblysynda alaıaqtyq qylmysy órship tur. Jyl basynan beri 686 alaıaqtyq qylmysy tirkelgen. Onyń ishinde 115 qylmys Telegram, WhatsApp, Instagram áleýmettik jelisi arqyly jasalǵany anyqtalǵan, dep habarlaıdy Kazinform.

Atyraý oblystyq polıtsııa departamenti krımınaldyq polıtsııa basqarmasynyń aǵa jedel ýákili Ashat Nurmanovtyń aıtýynsha, jyl basynan beri kıber qylmysqa qarsy eki márte «Anti-Fraud», bir ret «Hi-tech» jedel-profılaktıkalyq is-sharasy ótkizilgen.

«Jyl basynan beri ınternet jelisi arqyly jasalǵan 686 alaıaqtyq qylmysy tirkeldi. Qylmystyq isterdi zerdeleý kezinde turǵyndardyń áleýmettik jeliler arqyly tapsyrystar berip, aldyn-ala aqsha tóleıtini anyqtalyp otyr. Turǵyndar ınternet jelisindegi túrli jarnamaǵa senip, tapsyrys beredi. Sol sebepten, aldanyp qalý, aqshasynan aıyrylý deregi kóbeıip otyr», - dep habarlady Ashat Nurmanov.

Kıberpol arnaıy tobynyń jetekshisi, poltsııa kapıtany Nurlybek Berqalıevtiń pikirinshe, alaıaqtar áleýmettik jeli qoldanýshylarymen hat almasyp, senimine kiredi.

«Alaıaqtar Telegram, WhatsApp, Instagram paraqshalaryn paıdalanyp, aqshasyn kóbeıtýdi maqsat etken turǵyndardy quryǵyna tez túsiredi. Ońaı aqshaǵa qol jetkizýdi oılaǵandar aldanǵanyn sezbeı qalady. Qazir dál osyndaı derektermen 115 is tirkeldi. Sol sebepten, turǵyndar kóp aqsha ońaı jolmen kelmeıtinin bilgenin qalaımyz. Áleýmettik jelidegi jarnamada kórsetilgen aqparattyń durystyǵyn tekserý, abaı bolý qajettigin eskertemiz», - dep málim etti Nurlybek Berqalıev.

Eske sala ketelik, buǵan deıin alaıaqtyq kúdigine ilingen Atyraý qalasynyń burynǵy ákimi qamaýǵa alynǵanyn habarlaǵan bolatynbyz.