Atyraý oblysynda jyl basynan beri 252 adam bankrot bolǵan

ATYRAÝ. KAZINFORM – Jyl basynan beri sottan tys bankrottyq rásimge baılanysty 1343 adamnan ótinish túsken.

Atyraý oblysy boıynsha memlekettik kirister departamenti dármensiz boryshkerlermen jumys basqarmasynyń bas mamany Shuǵa Janshaevanyń málimetinshe, ótinish berýshilerdiń 252-si bankrot dep tanylǵan.

– Bankrottyqty rásimdeý úshin ótinish berýshiniń qaryz somasy 1 600 aılyq eseptik kórsetkishten, ótelmegen merzimi 12 aıdan asýy qajet. Ótken jyly 3 myńǵa jýyq adam bankrot rásimine ótinish bergen edi. Onyń ishinde 638 adamnyń ótinishi maquldandy. Bankrot dep tanylǵandardyń kópshiliginde úsh sebep bar. Birinshiden, turaqty kirisi tómendegen. Ekinshiden, nesıe men qaryz mindettemelerin óteý múmkindigi bolmaǵan. Úshinshiden, eńbek naryǵyndaǵy turaqsyzdyq sekildi qıyndyqqa tap bolǵany anyqtaldy, -deıdi Shuǵa Janshaeva. 

Onyń aıtýyna qaraǵanda, keıbir adamdardyń ótinishi tıisti talaptarǵa saı bolmaı shyqqan. Endi olar bas tartý sebepterin joıyp, úsh aı ótken soń bankrottyqqa qaıta ótinish bere alady.

– Al bankrottyq mártebesin alǵan adamdarǵa aldaǵy 5 jylda bankterden jáne mıkroqarjy uıymdarynan nesıe alýǵa tyıym salynady. Olardyń qarjylyq jaǵdaıyna úsh jyl boıy monıtorıng júrgiziledi, -dep málim etti Shuǵa Janshaeva.

Eske sala ketelik, buǵan deıin Atyraýda 10 aıda 81 adam bankrot dep tanylǵanyn habarlaǵan bolatynbyz.