Atyraý oblysynda jyl basynan beri 12 adam sýǵa ketti
ATYRAÝ. KAZINFORM – Atyraý oblysynda jyl basynan beri 12 adam sýǵa batyp ketken. Onyń ishinde 2 bala bar.
Atyraý oblystyq tótenshe jaǵdaılar departamenti azamattyq qorǵany basqarmasynyń bastyǵy Baqyt Ablanovtyń aıtýynsha, óńirdegi sý aıdyndarynda shomylýǵa qaýipti 70 ýchaske anyqtalyp otyr.
«Atyraý oblysynyń aýmaǵyndaǵy sý aıdyndaryna únemi monıtorıng júrgiziledi. Bıyl monıtorıng nátıjesimen ózenderde qaýipti 70 ýchaske anyqtalyp otyr. Sol sebepten bul ýchaskelerde shomylýǵa tıym salyndy. Osyndaı ýchaskelerde 238 tıym salý belgisi men 9 aqparattyq stend ornatyldy», - deıdi Baqyt Ablanov.
Onyń deregine qaraǵanda, tótenshe jaǵdaılar jáne polıtsııa departamentteriniń qyzmetkerleri turǵyndardyń sýdaǵy qaýipsizdik talaptaryn buzýyna jol bermeý baǵytyndaǵy birlesken reıdter ótkizip keledi.
«Birlesken reıd kezinde turǵyndarǵa sý aıdyndary jaǵalaýynda balalardy qaraýsyz qaldyrýdyń ókinishke uryndyrýy múmkin ekeni týraly túsinik júrgizildi. Bıyl jyl basynan beri qaýipsizdik talabyn saqtamaýdyń saldarynan 12 adam sýǵa batyp ketti. Onyń ishinde 2 bala bar. Al, balalaryn qaraýsyz qaldyrǵan 3 ata-anaǵa Ákimshilik quqyq buzýshylyq týraly kodeksine sáıkes aıyppul salyndy», - dedi Baqyt Ablanov.
Eske sala ketelik, keshe 15 jastaǵy jetkinshek Jaıyq ózeninen tasyǵan sýǵa batyp ketken edi.
Sondaı-aq, Atyraý oblysynda iz-túzsiz joǵalǵan eki jigittiń múrdesi tabylǵanyn jazǵan bolatynbyz.
Búgin Atyraý oblysynda sýǵa shomylý maýsymy qashan bastalatyny belgili bolǵanyn habarlaǵan edik.
