Atyraý oblysynda jer qoınaýyn utymdy paıdalaný jumystary kúsheıtiledi
ASTANA. KAZINFORM – Energetıka vıtse-mınıstri Erlan Akbarov Atyraý oblysyna jumys saparymen baryp, munaı-gaz ken oryndaryn aralady, jer qoınaýyn paıdalanýshylarmen kezdesti jáne otandyq munaı-gaz jabdyqtaryn óndirýshi kásiporyndardyń qyzmetimen tanysty, dep habarlaıdy Energetıka mınıstrligi.
Jumys saparynyń alǵashqy nysany Teńiz ken orny boldy. Vıtse-mınıstr «Teńizshevroıl» JShS basshylyǵymen jumys keńesin ótkizip, óndiristik nysandardy aralady.
Kezdesý barysynda ken ornyn ıgerýdiń aǵymdaǵy jaı-kúıi, jobalyq sheshimder men geologııalyq-tehnıkalyq is-sharalardyń oryndalýy, ıgerý tıimdiligi jáne kómirsýtek qorlaryn utymdy óndirý máseleleri qaraldy.
Qabat qysymyn ustap turý, munaı men gaz óndirý dınamıkasy, uńǵymalar qorynyń jaı-kúıi, sondaı-aq qabatta júrip jatqan protsesterdi neǵurlym naqty baǵalaý úshin keshendi geologııalyq-kásipshilik zertteýler júrgizý qajettiligine erekshe nazar aýdaryldy.
– Bekitilgen jobalyq sheshimderdi qatań saqtaý jáne jer qoınaýyn utymdy paıdalanýdy qamtamasyz etý qajet, – dep atap ótti vıtse-mınıstr.
Sol kúni Erlan Akbarov «Embimunaıgaz» AQ-nyń «Teńizshevroıl» JShS-men ortaq aýmaqta ornalasqan Batys Qarasor ken ornyna bardy. Munda ken ornyn ıgerý erekshelikteri jáne ony odan ári jete barlaý máseleleri qaraldy.
Sondaı-aq jumys sapary aıasynda vıtse-mınıstr Qaratonǵa baryp, júrgizilip jatqan jumystardyń barysymen tanysty.
Jumys saparynyń ekinshi kúni Erlan Akbarov Aırankól ken ornyna bardy. Vıtse-mınıstr ken ornyn ıgerýdiń jaı-kúıimen, tsıfrlyq sheshimderdiń qoldanylýymen jáne áleýmettik nysandarmen tanysty.
Qarsaq ken ornynda júrgizilip jatqan geologııalyq-tehnıkalyq is-sharalar, kóldeneń uńǵymalardy, onyń ishinde kólbeý saǵaly kóldeneń uńǵymalardy burǵylaý, sondaı-aq ken ornyn ıgerýdiń rentabeldiligin arttyrý jónindegi sharalar qaraldy.
Sonymen qatar vıtse-mınıstr Eskene ken ornyna baryp, joıý jumystarynyń aǵymdaǵy jaı-kúıimen tanysty.
21 tamyzda Atyraý qalasynda «QMG Injınırıng» fılıalynyń alańynda vıtse-mınıstrdiń jer qoınaýyn paıdalanýshylarmen kezdesýi ótti.
Kezdesý barysynda munaı-gaz kompanııalary qyzmetiniń ózekti máseleleri, kelisimsharttyq jáne jobalyq mindettemelerdiń oryndalýy, geologııalyq barlaý jumystaryn odan ári damytý jáne ken oryndaryn ıgerý tıimdiligin arttyrý máseleleri talqylandy.
Resýrstyq bazany júıeli túrde tolyqtyrý, zamanaýı tehnologııalardy engizý jáne ıgerýdiń sońǵy satysyndaǵy ken oryndarynyń tıimdiligin arttyrý qajettiligine erekshe nazar aýdaryldy.
Jumys saparynyń qorytyndy kezeńinde vıtse-mınıstr TShO, NCOC jáne «Embimunaıgaz» AQ ókilderimen birge Sigma Solutions, WIKA Kazakhstan, «AtyraýNefteMash», «JıgerMýnaıServıs» jáne KazBoltService otandyq kásiporyndaryn aralady.
Kásiporyndarda vıtse-mınıstr óndiristik qýattarmen, tehnologııalyq protsestermen jáne munaı-gaz salasyna arnalǵan shyǵarylatyn ónimdermen tanysty.
– Otandyq ónimge turaqty suranys qalyptastyrý jáne qazaqstandyq kásiporyndardyń iri munaı-gaz jobalaryna qatysýyn keńeıtý mańyzdy, – dep atap ótti Erlan Akbarov.
Kásiporyndardy aralaý barysynda otandyq óndiristik qýattardyń júktemesin arttyrý, jergiliktendiriletin ónimder nomenklatýrasyn keńeıtý jáne qazaqstandyq kompanııalardyń iri munaı-gaz operatorlarynyń satyp alýlaryna qatysý máseleleri talqylandy.
Jumys saparynyń qorytyndysy boıynsha ken oryndaryn ıgerý tıimdiligin arttyrý, resýrstyq bazany tolyqtyrý, jer qoınaýyn utymdy paıdalaný jáne otandyq óndirýshilerdiń munaı-gaz jobalaryna qatysýyn keńeıtý jóninde tıisti tapsyrmalar berildi.
Aıta keteıik, Atyraýda 1 mlrd teńgelik ınvestıtsııalyq jobany iske asyrýǵa zańsyz kedergi jasalǵan.
