Atyraý oblysynda jer qoınaýyn paıdalanýshyǵa 12,2 mlrd teńge aıyppul salyndy

ATYRAÝ. KAZINFORM – Atyraý oblysy prokýratýrasynyń baspasóz qyzmetinen málim etkendeı, tabıǵat qorǵaý zańnamasynyń saqtalýyna tekserý júrgizilgen. Zańdylyqty buzýshylardan bıylǵy 5 aıda bıýdjetke 15,2 mlrd teńgeden astam qarjy óteldi.

«Jer qoınaýyn paıdalanýshy ekologııalyq ruqsatsyz 5 mln tekshe metr kóleminde kúkirtti gazdy jaǵýǵa jol bergeni anyqtaldy. Prokýrorlyq qadaǵalaý sharalarymen kináli QR Ákimshilik quqyq buzýshylyq týraly kodeksiniń 328-babynyń 1-bóligi (Qorshaǵan ortaǵa antropogendik áser etý normatıvterin buzý) boıynsha jaýapqa tartyldy. Kinálige 12,2 mlrd teńge kóleminde aıyppul salyndy», - dep habarlady prokýratýranyń baspasóz qyzmeti.

Qazir ekologııalyq zańnama talaptaryn saqtaý máselesi oblystyq prokýratýranyń erekshe baqylaýyna alynyp otyr.

Eske sala ketelik, buǵan deıin Atyraýda 4 aıda 7 kásiporynǵa 13,7 mlrd teńge aıyppul salynǵanyn jazǵan bolatynbyz. 

Sondaı-aq, Atyraý munaı óńdeý zaýytynyń qondyrǵysynan sary tútin býdaqtaǵanyn habarlaǵan edik.