Atyraý oblysynda jeńil kólik kólge túsip ketti

Atyraý oblysynda júrgizýshi jeńil kóligimen muz ústimen júrgen. Alaıda kóliktiń salmaǵyn kótere almaı muz oıyldy. Kólik kólge túsip ketti, dep habarlaıdy Kazinform. 

Jeńil kóliktiń sýǵa batqany týraly foto áleýmettik jelige júkteldi. Oblystyq Polıtsııa departamentiniń baspasóz qyzmetinen málim etkendeı, oqıǵa Jylyoı aýdanynda bolǵan.

Keshe, 18 jeltoqsanda jergilikti ýaqytpen saǵat 17:00 shamasynda Jylyoı aýdanynyń ortalyǵy – Qulsary qalasynyń mańyndaǵy Qamyskól kóline jeńil kólik túsip ketken. Toyota Camry kóliginiń júrgizýshisi tyıym salynǵan belgilerge qaramastan muz ústimen jýrge áreket jasaǵan. Jeńil kólik jaǵalaýdan 40 metrdeı júrgende muz jarylǵan.

«Kólikte bolǵan adamdar din aman. Eshkim zardap shekken joq», - dep habarlady departamenttiń baspasóz qyzmeti.

Kólik ıesi oblystyq tótenshe jaǵdaılar departamenti Jylyoı aýdandyq bóliminiń qyzmetkerleriniń kómegine júgingen. Tótenshelikter jeńil kólikti sýdan shyǵardy.

Oblystyq tótenshe jaǵdaılar departamenti turǵyndarǵa juqa muzdyń qaýpi týraly birneshe ret eskertý jasady.

«Qalyńdyǵy 15 sm kem emes qaýipsiz dep sanalady. Muzdyń qaýipsiz ekenin jasyl nemese kókshil túske boıalǵanyna bilýge bolady. Sý aıdyny qoımalarynda arnaıy jabdyqtalǵan ótkel bolmasa, muz ústimen júrmegen jón. Qar astynda jáne jaǵalaýda muzdyń óte qaýipti ekenin este ustaý qajet», - dedi departamenttiń qoǵammen baılanys toby.

Eske sala ketelik, budan buryn «Atyraý oblysy Sý Arnasy» ókili Jaıyqta muzdyń tyǵyz massasy 20 jyldan beri bolmaǵanyn aıtqan edi.