Atyraý oblysynda jeńil kólik aýdarylyp, júrgizýshi oqıǵa ornynda mert boldy

ATYRAÝ. KAZINFORM – Atyraý oblysyndaǵy Maqat aýdanynyń aýmaǵynda jeńil kólik aýdarylyp qaldy. Jol apatynyń saldarynan júrgizýshi oqıǵa ornynda kóz jumdy.

Atyraý oblystyq polıtsııa departamenti baspasóz qyzmetiniń aqparatyna qaraǵanda, jol-kólik oqıǵasy búgin, 20 qarashada tańǵy saǵat 05:30 shamasynda bolǵan. 

«Aqtóbe-Atyraý-Reseı Federatsııasynyń shekarasy» baǵytyndaǵy joldyń 480-shaqyrymy Subaru Legacy markaly avtokóligi aýdaryldy. Kóliktiń aýdarylýyna 46 jastaǵy júrgizýshiniń rýldi ıgere almaǵany sebep bolǵan. Jol-kólik oqıǵasynyń saldarynan júrgizýshi túrli dene jaraqatyn aldy. Alaıda, ol oqıǵa ornynda qaıtys boldy», -dep habarlady departamenttiń baspasóz qyzmeti. 

Qazir Maqat aýdandyq polıtsııa bóliminiń qyzmetkerleri jol apatyna baılanysty tıisti is qujattaryn jınaqtap jatyr. 

Baspasóz qyzmetiniń málimetinshe, patrýldik polıtsııa qyzmetkreleri jol apatynyń aldyn alý úshin udaıy baqylaý júrgizedi. Soǵan qaramastan, júrgizýshiler polıtseılerdiń eskertýin elemeıdi. 

«Jyl basynan beri elimizdiń batys aımaǵynda 219 adam jol apatynan qaza tapty. Osy óńirlerde 250-den astam maldy kólik qaqty. Osyndaı jol apatyna aldaǵy kólikten ozý qaǵıdasyn buzý sebep bolyp otyr. Sol sebepten, júrgizýshilerge jol erejesin qatań saqtaýdy eskertemiz», -dep málim etti departamenttiń baspasóz qyzmeti. 

Eske sala ketelik, budan buryn Atyraýda jyl basynan beri jol apatynan 73 adam mert bolyp, 858-i jaraqat alǵanyn jazǵan edik. 

Sondaı-aq, Atyraýda jyl basynan beri kólik róline otyrǵan 732 mas júrgizýshi ustaldy.