Atyraý oblysynda Jaıyq jaǵasyndaǵy bógette 2 myńnan astam kezekshi tur

ATYRAÝ. KAZINFORM – Atyraý oblysynda Jaıyq ózeninen tónetin sý tasqynynyń qaýpi seıilgen joq. Qazir ózen jaǵasyndaǵy bógette 2 myńnan astam kezekshi tur. 

Atyraý oblysynyń ákimi Serik Shápkenov jedel shtab jıynyn ótkizip, qaýipti ýchaskelerde kezekshilikti kúsheıtýge nazar aýdardy.

«Qazir Inder aýdanynda sý deńgeıi tómendedi. Alaıda, arqany keńge salýǵa bolmaıdy. Nópir sý Mahambet aýdanynyń aýmaǵyna keldi. Bóget astyndaǵy eski qubyrlarǵa salmaq túsip, sý qatty qysymmen bógetti jaryp jatyr. Mundaı qaýipti oryndarǵa kezekshilikti kúsheıtý kerek. Endi mol sý Atyraý qalasyna jetedi. Qalada sý aýdandardaǵydaı jan-jaqqa jaıylyp ketpeı, bir arnamen ótedi. Qatty aǵyspen kelgende sý deńgeıi kóterilýi múmkin. Kezekshiliktegi mamandar bir jerde turmaı, ýchaskeni tolyq qadaǵalaýy kerek. Jaıbaraqat otyratyn kez emes. Saryózek pen Sokolok arnasy – qalanyń negizgi qorǵanys qurylymy. Sý bul arnalarǵa jetkenshe, biraz ýaqyt ótedi. Oqys jaǵdaıdyń aldyn alý úshin mezgilinde dabyl qaǵý qajet», - dedi Serik Shápkenov.

Ákimniń pikirinshe, jetispeıtin qural-jabdyqtardy tolyqtyryp, bóget basyndaǵy qaýipsizdik erejesin saqtaý qajet.

Atyraý oblysynda 500 shaqyrymnan astam bóget salyndy. Qazir bógette 2 myńnan astam adam táýlik boıy kezekshilik atqaryp júr. Onyń mekemelerdiń qyzmetkerleri, eriktiler men áskerı qyzmetshiler bar.

Eske sala ketelik, budan buryn Atyraý-Oral trassasynyń Mahambet aýdanyndaǵy 56-shaqyrymy jyrylǵanyn habarlaǵan edik.