Atyraý oblysynda Jaıyq ózenindegi sý tasqyny sharyqtaý sheginen ótti

ATYRAÝ. KAZINFORM – Atyraý oblysynda Jaıyq ózenindegi sý tasqyny sharyqtaý sheginen ótti.

Atyraý oblystyq tótenshe jaǵdaılar departamenti basshysynyń orynbasary Rýslan Sharıevtiń aıtýynsha, Inder jáne Mahambet aýdanynda, sondaı-aq Atyraý qalasynda Jaıyq ózenindegi sý deńgeıi tómendep keledi.

«Atyraý oblysynda sý tasqyny sharyqtaý shegine jetti. Qazir Jaıyq ózenindegi sý deńgeıi tómendeı bastady. Inder, Mahambet aýdandarynda jáne Atyraý qalasynda Jaıyq ózenindegi sý deńgeıin kúndelikti baqylap otyrmyz. Jaıyqtan tasyǵan sý jyralarǵa jaıylyp, kóp aýmaqty sý basty. Budan sharýa qojalyqtaryna qaýip tóndi», - dedi Rýslan Sharıev.

Onyń aıtýyna qaraǵanda, sharýa qojalyqtarynyń ıelerinen jedel jelige túsken barlyq qońyraýǵa baılanysty kómek berilgen. Sý basqan aýmaqta qalǵan maldy evakýatsııalaý júrgizilip jatyr.

«Qazir oblystyq jáne respýblıkalyq mańyzy bar tasjoldardy sý basý deregi tirkelip otyr. Sý deńgeıi tómendegennen keıin joldardy qalpyna keltirý jumysy júrgiziledi. Ázirge sýdyń qaýipsizdigi týraly aıtýǵa erterek. Infraqurylym nysandary tolyqtaı qalpyna keltirilip, barlyq jumys aıaqtalǵannan keıin ǵana sýdyń qaýipsizdigi týraly aıtýǵa bolady», -dedi Rýslan Sharıev.

Búgin, 4 maýsymda Jaıyq ózeniniń deńgeıi Inder jáne Mahambet aýdanynda tómendedi. Máselen, kúndizgi saǵat 12:00-de Jaıyqtyń sýy Inderbor kentinde 920 sm boldy. Al, Mahambet aýdanynda 10 metr 4 santımetr bolyp tur.

Jaıyq ózeni Atyraý qalasynda keshegi 597 sm deńgeıinen ózgergen joq. Munaı shahar mańyndaǵy Jańatalap jáne Erkinqala aýyldarynyń tusynda da kóterilmedi.

Eske sala ketelik, buǵan deıin Jaıyq ózeniniń deńgeıi Atyraý tusynda da tómendeı bastaǵanyn jazǵan edik.