Atyraý oblysynda jaýynnan qyrylǵan mal úshin ótemaqy tólenbeıdi
ATYRAÝ. KAZINFORM – Atyraý oblysy Jylyoı aýdanynda jaýyn-shashynnan keıin batpaqqa batyp qyrylǵan 1200-den astam usaq malǵa ótemaqy tólenbeıdi.
Oblystyq aýyl sharýashylyǵy jáne jer qatynastary basqarmasy muny tabıǵı qubylys pen sharýalardyń óz jaýapkershiligimen baılanysty jaǵdaı dep túsindirdi.
Ákimdik ókilderi shyǵynnyń ótelmeý sebebin jaǵdaıdyń tabıǵı jáne adamı faktordan bolýymen baılanystyryp otyr. Atyraý oblystyq aýyl sharýashylyǵy jáne jer qatynastary basqarmasynyń bólim basshysy Saıran Ǵudnannyń sózinshe, sharýalar aýa raıynyń qolaısyz bolatynyn eskermeı qalǵan.
- Ólekseleri túgeldeı órtenip, joıyldy. Qazir jaǵdaı turaqtandy. Basqarma tarapynan asa qaýipti aýrýlar anyqtalmaǵandyqtan ótemaqy tólenbeıdi,-dedi Saıran Ǵudnan.
Eske salaıyq, 2-3 maýsymda Jylyoı aýdanyna qarasty Saryqasqa jáne Jeltaý aýmaqtarynda shamamen 15 saǵat boıy tolassyz nóser jańbyr jaýyp, ekpindi jel soqqan.
Saldarynan Qosshaǵyl aýyldyq okrýgi, Qulsary qalasy jáne Maıkómgen aýyldyq okrýgi aýmaǵyndaǵy sharýashylyqtarda barlyǵy 1238 bas usaq maldyń qyrylǵany belgili boldy.
