Atyraý oblysynda jat aǵymdaǵy 37 adam teris dinı aqparat taratqan

ATYRAÝ. KAZINFORM – Atyraý oblysynda jat aǵymdaǵy 37 adamǵa teris dinı aqparatty taratqany úshin aıyppul salyndy.

Atyraý oblystyq din isteri basqarmasynyń basshysy Qaharman Musaevtyń málimetine súıensek, 2 myńnan astam adamdy dinı teris aǵymnyń jeteginen shyǵarý úshin tıisti jumys júrgizilgen. 

«Kez kelgen adamnyń kózqarasyn, ustanymyn ózgertýge yqpal etý ońaı emes. Ásirese, teris dinı aǵymnyń jetegindegi adamdardy raıynan qaıtarý úshin 1 jyldaı merzim qajet. Osy oraıda din salasynyń mamandary túsindirý jáne ońaltý jumystaryna basymdyq berip otyr. Sonyń nátıjesinde 88 adam teris dinı aǵymnyń shyrmaýynan shyǵyp, kózqarasyn ózgertti», -deıdi Qaharman Musaev.

Onyń deregine qaraǵanda, 37 adamǵa 50 aılyq eseptik kórsetkish mólsherinde aıyppul salynǵan. Óıtkeni, olar QR Dinı qyzmet jáne dinı birlestikter týraly zańnyń talabyn buzǵan. 

Eske sala ketelik, budan buryn Qaharman Musaev Atyraý oblysy Din isteri basqarmasyna basshy bolǵanyn habarlaǵan edik. 

Qaharman Musaev 1982 jyly Atyraý oblysynda dúnıege kelgen. Túrkııa Respýblıkasyndaǵy Selchýk ýnıversıtetin teolog, Batys Qazaqstan ınnovatsııalyq-tehnologııalyq ýnıversıtetin quqyqtaný mamandyǵymen bitirgen.

2012 jyldyń sońynan beri Atyraý oblystyq Din isteri basqarmasynda túrli basshylyq laýazymdy atqarǵan.