Atyraý oblysynda jasóspirimder jasaǵan 72 qylmys tirkelgen

Atyraý oblysynda jyl basynan beri tirkelgen qylmystyń deni menshikke qarsy jáne qoǵamdyq tártipti buzýmen baılanysty bolyp otyr. Al, qylmys jasaǵan kúdiktilerdiń arasynda 1 qyz bar, dep habarlaıdy Kazinform.

Oblystyq polıtsııa departamenti bastyǵynyń birinshi orynbasary Ábdiǵanı Seıdýalıevtiń aıtýynsha, jasóspirimder tarapynan jasalǵan 72 qylmys tirkelgen.

«Jyl basynan beri jasóspirimder qylmysynyń aldyn alý úshin múddeli memlekettik organdarmen birlesken jedel profılaktıkalyq is-sharalar ótkizildi. Jasóspirimder menshikke qarsy jáne qoǵamdyq tártip buzý sekildi qylmysty jasaýǵa beıim. Osyndaı qylmystyń 65-in balalar jasaǵany anyqtaldy. Biraq, bul kórsetkish ótken jylǵy derekpen salystyrǵanda 5,8 paıyzǵa tómen. Kúdikke ilingen jasóspirimderdiń bireýi – qyz bala. Al, 13 jasóspirimniń jasy 14-15-te bolsa, 52-si 16-17 jasta», - deıdi Ábdiǵanı Seıdýalıev.

Eske sala ketelik, budan buryn Atyraý oblysynda adam óltirý, kámeletke tolmaǵandardy zorlaý qylmysy óskenin habarlaǵan edik.

Oblystyq prokýratýra baspasóz qyzmetiniń málimetinshe, bıyl densaýlyqqa aýyr zııan keltirý faktileri 15%-ǵa (40-tan 46-ǵa deıin), adam óltirýge oqtalý 40%-ǵa (5-ten 7-ge deıin), ózin-ózi óltirý 48%-ǵa (325-ten 348-ge deıin), adam óltirý 75%-ǵa (7-den 12-ge deıin) ósken. Sondaı-aq, kámeletke tolmaǵandardy zorlaý 60%-ǵa (5-ten 8-ge deıin), jas balalardy azǵyndyq jolǵa túsirý 75%-ǵa (4-ten 7-ge deıin) artqan.