Atyraý oblysynda zańsyz balyq aýlaýshylardan 1,8 tonna bekire tárkilendi
ATYRAÝ. KAZINFORM – Atyraý oblysynda «Bekire – 2024» aktsııasy kezinde zańsyz balyq aýlaýshylardan 1,8 tonna bekire tárkilendi.
Elimizdiń batysyndaǵy Atyraý, Mańǵystaý jáne Batys Qazaqstan oblysyndaǵy sý aıdyndarynda «Bekire – 2024» balyq qorǵaý aktsııasy aıaqtaldy. Bul aktsııa 1 sáýirden 31 mamyrǵa deıin sozyldy.
«Aktsııanyń maqsaty – brakonerlik is-árekettiń, bekire tuqymdas jáne basqa da balyq túrleriniń, olardyń ónimderiniń zańsyz aınalymyn anyqtaý. Іs-shara kezinde Erkinqala eldi mekeninde jáne Jaıyq ózeni boıyndaǵy «Peshnoı» beketinde balyq qorǵaý ınspektsııasymen birlesken mobıldik toptar jumys istedi. Erkinqala, Damby, Alǵabas aýyldaryna qatynaıtyn jolda avtokólik quraldarynyń qozǵalysyna baqylaý júrgizildi. Zańsyz balyq aýlaýshylardan 7 qaıyq, 8 avtokólik, 9 aıǵaq zat alyndy. Zańsyz aınalymnan 1 tonna 827 keli bekire tuqymdas balyq, 5 keliden astam qaraýyldyryǵy tárkilendi», - dep habarlady Polıtsııa departamentiniń baspasóz qyzmeti.
«Bekire – 2024» aktsııasy kezinde balyqtyń zańsyz aınalymyna baılanysty 107 quqyq buzýshylyq anyqtalǵan. Onyń ishinde 36 qylmysqa qatysty sotqa deıingi tergep- tekserý amaldary júrgizilip jatyr.
Eske sala ketelik, buǵan deıin Kaspıı teńiziniń akvatorııasynda bir aıda 703 keli bekire zańsyz aýlanǵanyn jazǵan edik.
