Atyraý oblysynda Volvo-men soqtyǵysqan Mitsubishi Outlander órtenip, eki adam mert boldy
ATYRAÝ. KAZINFORM — Atyraý oblysynda Volvo júk kóligi qarsy baǵytta kele jatqan Mitsubishi Outlander-men soqtyǵysty. Jol apatynyń saldarynan jeńil kólik órtenip, eki adam mert boldy.
Bul derekti Atyraý oblystyq polıtsııa departamentiniń baspasóz qyzmeti rastady. Jol-kólik apaty búgin, 4 aqpanda Reseımen shekaralas Qurmanǵazy aýdanynyń aýmaǵynda bolǵan.
«Jergilikti ýaqytpen saǵat 15:30 shamasynda respýblıkalyq mańyzdaǵy Aqtóbe-Atyraý-Astrahan tas jolynyń 873-shaqyrymy tusynda eki kólik soqtyǵysty. Atalǵan joldyń Qurmanǵazy aýdanyndaǵy Bókeıhan aýylyna jaqyn tusta Volvo markaly júk kóligi qarsy baǵytta kele jatqan Mitsubishi Outlander avtokóligimen soqtyǵysqan. Júk kóliginiń rýlinde 1958 jylǵy júrgizýshi bolǵany anyqtaldy. Jol-kólik oqıǵasynyń saldarynan Mitsubishi Outlander avtokóligi órtke orandy. Jeńil kóliktiń 1964 jylǵy júrgizýshisi men 59 jastaǵy jolaýshysy oqıǵa ornynda qaza tapty», - dep habarlady departamenttiń baspasóz qyzmeti.
Qazir polıtsııa qyzmetkerleri jol-kólik oqıǵasyna baılanysty tıisti is qujattaryn jınaqtap jatyr.
Eske sala ketelik, budan buryn Atyraý oblysynda jol apatynan 32 jastaǵy júrgizýshi mert bolǵanyn habarlaǵan edik.
Sondaı-aq, Jaıyqqa túsip ketken jeńil kóliktiń júrgizýshisi mert boldy.
