Atyraý oblysynda vahtalyq jumysshylar úshin eki saılaý ýchaskesi quryldy
ASTANA. KAZINFORM — Atyraý oblysynda vahtalyq kentterdegi saılaý ýchaskeleriniń daıyndyǵy tekserildi, dep habarlaıdy Ortalyq saılaý komıssııasynyń baspasóz qyzmeti.
2026 jylǵy 23 tamyzǵa taǵaıyndalǵan QR Quryltaıynyń depýtattaryn saılaýǵa daıyndyq barysyn tekserý maqsatynda 13-14 tamyz kúnderi Atyraý oblysyna Ortalyq saılaý komıssııasynyń hatshysy Shavhat Ótemisov pen Ortalyq saılaý komıssııasynyń múshesi Azamat Aımanakýmov ınspektsııalyq saparmen bardy.
Zańnamaǵa jaqynda engizilgen ózgeristerge sáıkes qurylǵan saılaý ýchaskeleriniń qyzmetine erekshe nazar aýdaryldy. Olar vahtalyq ádispen jumys isteıtin azamattardyń saılaý quqyqtaryn qamtamasyz etýdi kózdeıdi.
— Atyraý oblysynyń aýmaǵynda saılaýshylar úshin osyndaı 2 jańa saılaý ýchaskesi ashyldy. Birinshisi — «NCOC» kompanııasynyń munaı men gazdy keshendi daıyndaý jónindegi «Bolashaq» zaýytynyń aýmaǵyndaǵy «Samal» vahtalyq kentinde ornalasqan. Ekinshisi — «Prorva» ken ornyndaǵy «Jylyoımunaıgaz» kásipornynyń «Kaspıı samaly» vahtalyq kentinde ornalasqan. Shavhat Ótemisov pen Azamat Aımanakýmov «Samal» kentiniń aýmaǵynda ornalasqan № 288 saılaý ýchaskesiniń daıyndyq deńgeıimen tanysty, — delingen taratylǵan aqparatta.
Inspektsııalyq toptyń negizgi maqsattarynyń biri — saılaý komıssııalary múshelerin oqytý protsesimen de tanysý boldy. Osyǵan baılanysty OSK ókilderi oqytý semınaryna qatysty. Oblystyq, qalalyq jáne aýdandyq aýmaqtyq saılaý komıssııalarynyń, sondaı-aq Atyraý qalasynyń ýchaskelik saılaý komıssııalarynyń múshelerimen saılaýdy daıyndaý jáne ótkizý jónindegi is-sharalar jospary, saılaý zańnamasyna engizilgen ózgerister jáne jasandy ıntellekt quraldaryn tıimdi paıdalaný máseleleri talqylandy. Qatysýshylardyń praktıkalyq daǵdylaryn jetildirý maqsatynda keıstermen jáne qajetti qujattarmen jumys júrgizildi.
Sapardyń ekinshi kúni tıisti memlekettik jáne quqyq qorǵaý organdarynyń ókilderi, aýmaqtyq saılaý komıssııalarynyń tóraǵalary qatysqan jumys keńesi ótti. Keńeske sondaı-aq EQYU DIAQB Mıssııasynyń halyqaralyq baıqaýshylary qatysty. Keńes barysynda memlekettik organdardyń basshylarynyń óńirdiń saılaýǵa daıyndyǵy, órt qaýipsizdigin qamtamasyz etý, sondaı-aq múgedektigi bar adamdar úshin qolaıly jaǵdaılar jasaý máseleleri boıynsha esepteri tyńdaldy.
Inspektsııalyq sapar aıasynda Ortalyq saılaý komıssııasynyń ókilderi Atyraý qalasyndaǵy № 275, № 285, № 90 jáne № 262 ýchaskelik saılaý komıssııalarynyń jumysymen tanysty.
Inspektsııalyq sapar qorytyndysy boıynsha saılaýdy uıymdastyrýdyń, saılaý komıssııalarynyń daıyndyǵynyń, azamattardyń saılaý quqyqtaryn qamtamasyz etýdiń, qoǵamdyq qaýipsizdikti saqtaýdyń, sondaı-aq daýys berý kúni saılaý ýchaskelerinde qajetti jaǵdaılar jasaýdyń negizgi máseleleri qosymsha pysyqtaldy.
Buǵan deıin Quryltaı saılaýy qarsańynda óndiris oryndarynda jańa saılaý ýchaskeleri ashylǵany belgili boldy.
