Atyraý oblysynda úsh adamnyń ómirin qıǵan jol apatyna kináli adam sottaldy
ATYRAÝ.KAZINFORM - Atyraý oblysynda qoǵamdyq rezonans týdyrǵan jol-kólik oqıǵasy faktisi boıynsha qylmystyq isti qaraýy aıaqtaldy. Bul týraly Bas prokýratýra habarlady.
2023 jylǵy 21 tamyzda «Atyraý - Astrahan» tas jolynda kólik júrgizýshi jol-kólik oqıǵasyna jol berip, saldarynan úsh adam qaza taýyp, taǵy birneshe adam ártúrli dárejedegi dene jaraqatyn alǵan bolatyn.
Tergep-tekserý amaldary aıaqtalǵannan keıin, bul is 2024 jyly negizinen qaraý úshin sotqa joldandy. Alaıda sot sheshimi joǵary turǵan ınstantsııalarmen birneshe ret qaıta qaralyp, kúshi joıylǵandyqtan, uzaq ýaqyt boıy kináli tulǵanyń jazalanýyn qamtamasyz etý múmkin bolmady.
Jańadan qaraý qorytyndysy boıynsha 2026 jylǵy 23 aqpanda memlekettik aıyptaýshylar ádil sot sheshimine qol jetkizdi.
Sot úkimimen júrgizýshi QR QK-niń 345-baby 4-bóligimen kináli dep tanylyp, oǵan 7 jyl merzimge kólik quralyn basqarý quqyǵynan aıyra otyryp, 5 jylǵa bas bostandyǵynan aıyrý jazasy taǵaıyndaldy.
2026 jylǵy 4 maýsymda Atyraý oblystyq sotynyń qylmystyq ister jónindegi sot alqasy aıyptaý úkimin ózgerissiz qaldyrdy.
Bul mysal qylmystyq quqyq buzýshylyqtar, sonyń ishinde aýyr zardaptarǵa ákep soqqan Jol júrisi qaǵıdalaryn óreskel buzý jaǵdaılary úshin jazanyń bultartpastyǵyn aıǵaqtaıdy.
Osy jyldyń bes aıynda sottarmen 28 qylmystyq is qaralyp, olardyń nátıjesi boıynsha 18 tulǵa naqty bas bostandyǵynan aıyrý jazasynasottaldy.
Prokýratýra jol júrisiniń barlyq qatysýshylaryn joldarda barynsha muqııat ári jaýapty bolýǵa, jol júrisi qaǵıdalarynyń talaptaryn múltiksiz saqtaýǵa jáne bir qateliktiń baǵasy adam ómirin qııýy múmkin ekenin este saqtaýǵa shaqyrdy.
Aıta keteıik, 14 shildede Atyraý oblysynda bir otbasynyń múshelerin asa qatygezdikpen óltirgen azamatqa ómir boıyna bas bostandyǵynan aıyrý jazasy taǵaıyndaldy.
