Atyraý oblysynda túıe urlaýmen aınalysqan qylmystyq top ustaldy
ATYRAÝ. KAZINFORM – Іshki ister mınıstrligi «Zań jáne tártip» qaǵıdaty aıasynda mal urlyǵyn anyqtaý jáne aldyn alý boıynsha júıeli jumystardy júrgizip jatyr. 9 sáýirde Atyraý oblysynda polıtsııa qyzmetkerleri túıe urlaýmen aınalysqan uıymdasqan qylmystyq topty ustady.
Tergeý barysynda qylmyskerler dala aımaqtarynda erkin jaıylǵan maldy baqylap, túngi ýaqytta olardy aıdap áketkeni anyqtaldy.
Polisia.kz-tiń habarlaýynsha, urlanǵan túıeler júk kóligimen Mańǵystaý oblysyna jetkizilip, keıin satýǵa shyǵarylǵan. Qazirgi ýaqytta toptyń mal urlyǵyna qatysy bary dáleldenip, keltirilgen shyǵyn kólemi 10 mıllıon teńgeden asty. Urlanǵan maldyń bir bóligi tárkilenip, satylýyna jol berilmedi.
Barlyq kúdiktiler ustalyp, qamaýǵa alyndy.
Іshki ister mınıstrligi mal ıelerine maldaryn esepke alý, onyń ishinde chıpteý jumystaryn júrgizý jáne qaraýsyz qaldyrmaý sharalaryn saqtaýdy usynady. Bul sharalar mal urlyǵyn aldyn alýǵa baǵyttalǵan.
Budan buryn habarlaǵanymyzdaı, BQO-da mal urlyǵyn uıymdastyrǵan top quramynda veterınarlar bolǵan.
