Atyraý oblysynda turǵyndary ishimdikten bas tartqan aýyldar sany 54-ke jetti

ATYRAÝ. KAZINFORM – Atyraý oblysynda 54 aýyldyń turǵyndary alkogoldik ishimdikten bas tartty.

Atyraý oblystyq Polıtsııa departamentiniń baspasóz qyzmetinen málim etkendeı, turǵyndary ishimdik ishpeıtin aýyldar 7 aýdanda ornalasqan.

– Inder aýdanyndaǵy Qurylys aýylynyń turǵyndary 5 jyl buryn alkogoldik ishimdikten bas tartý qadamyn jasaǵan edi. Turǵyndardyń osyndaı ıgi qadamynyń nátıjesinde sońǵy 1 jylda bul aýylda birde-bir qylmys tirkelgen joq. Bul ózge aýdandardaǵy aýyldardyń turǵyndaryna oń áserin tıgizdi. Atyraý oblysynda bıylǵy 20 aqpanǵa deıin turǵyndary ishimdik ishpeıtin aýyldardyń sany 54-ke jetti, - dep habarlady departamenttiń baspasóz qyzmeti.

Іshimdikten bas tartqan aýyldardyń kóshin Qyzylqoǵa aýdany bastap tur. Bul aýdanda 17 aýyldyń turǵyndary alkogoldik ishimdikti ishpeıdi. Reseı Federatsııasymen shekarada ornalasqan Qurmanǵazy aýdanyndaǵy 16 aýyldyń turǵyndary da osyndaı ıgi qadamǵa baryp otyr. Al Mahambet aýdanynda 7, Isataıda – 6, Inderde – 4, Jylyoıda – 3, Maqat aýdanynda 1 aýyldyń turǵyndary ishimdikten bas tartqan.

Inder aýdanyndaǵy Qurylys aýylynda azyq-túlik satatyn eki dúken bar. Sonyń biriniń satýshysy Ásel Imanǵalıevanyń aıtýynsha, kúndelikti tutynatyn ózge taǵamdardy satýdan kiris az túspeıdi.

– Araq pen temekiniń adamnyń densaýlyǵyna da, taǵdyryna da zııany kóp. Bul – adamdy jaman áreketke áýes etetin ónimder. Sol sebepten aýyl turǵyndarynyń bastamasyn qoldap, dúkende tek azyq-túlikti ǵana satýǵa sheshim qabyldadyq, - deıdi Ásel Imanǵalıeva.

Jarsýat aýyldyq okrýginiń ákimi Erbol Bókeevtiń málimetinshe, ótken jyly eldi meken kóshelerine asfalt tóselip, jaryq berilgen. Jazǵy sý qubyry tartylǵan. Internet jelisi bar.

– Bizdiń aýyldyń turǵyndary kópten beri ishimdik ishpeıdi. Úlkenderdiń aqylyn tyńdap, keńesin eki etpeıtin balalarymyz jaqsy nátıjege jetip júr. Kópshiligi sportpen shuǵyldanady. Jaqynda aýylymyzda kishkentaı balalar oınaıtyn alań salyndy, - deıdi aýyl turǵyny Aıgúl Qajyǵalıeva.

Eske sala ketelik, budan buryn Atyraýdaǵy Qurylys aýylynyń turǵyndary 5 jyl buryn ishimdikten bas tartqanyn habarlaǵan bolatynbyz.

Keıin Qyzylúı aýylynyń turǵyndary ishimdikten bas tartty.