Atyraý oblysynda turǵyndary qaıta oralǵan Jalǵansaı aýylyndaǵy bóget bekitilip jatyr

ATYRAÝ. KAZINFORM – Atyraý oblysynda turǵyndary qaıta oralǵan Jalǵansaı aýylyndaǵy bógetti bekitilip jatyr.

Mahambet aýdanyndaǵy Jalǵansaı aýyldyq okrýginiń ákimi Asyljan Qaıyrǵalıevtyń aıtýynsha, eldi mekende burynnan 3,5 shaqyrym bóget bolǵan. Jaqynda taǵy 3,5 shaqyrym bóget soǵylǵan. 

«Túnde aýdan ortalyǵyna evakýatsııalanǵan eldi mekenniń 200-ge jýyq turǵyny qaıta oraldy. Qazir tasqynnyń qaýpin seıiltý maqsatynda aýylǵa kiretin jol men bóget arasyndaǵy sý arnaıy tehnıkalarmen qurǵatylyp júrip jatyr. Qazir qaýipsizdik sharalaryna 100-ge jýyq adam jumyldy. Onyń ishinde áskerıler, tótenshe jaǵdaılar salasynyń mamandary men jergilikti turǵyndar bar. Bóget mańynda kezekshilik kúsheıtilýdi», -deıdi Asyljan Qaıyrǵalıev. 

Aýyl turǵyny Dúısenbaı Meńdiǵalıevtiń aıtýyna qaraǵanda, jarylǵan bógetti qalpyna keltirý túnimen júrgizilgen. 

«Qaýipsizdik úshin aýyldaǵy áıelder, balalar Mahambet aýylyna mektepke evakýatsııalandy. Qazir jaǵdaı turaqtandy. Turǵyndar úılerine oraldy. Biz aýyldy tasqyn sýdan qorǵaý úshin jumysymyzdy jalǵastyra beremiz», -deıdi Dúısenbaı Meńdiǵalıev. 

Eske sala ketelik, buǵan deıin qaýip seıilip, Jalǵansaı aýylynyń turǵyndary úılerine oralyp jatqanyn jazǵan edik.