Atyraý oblysynda turǵyndar sany 700 myńnan asty

ATYRAÝ. KAZINFORM – Atyraý oblysynda turǵyndar sany 703 180 adamǵa jetti. Turǵyndardyń basym bóligi Atyraý qalasynda turady. 

Ulttyq statıstıka bıýrosy Atyraý oblysy boıynsha departamentiniń basshysy Nurjan Qumarǵalıevtyń deregine súıensek, Atyraý qalasynda 389 669 adam turatyny anyqtalǵan. Al 313 511 adam aýyldarda qonystanǵan.

«Keıingi bes jylda óńir turǵyndarynyń sany 57 900 adamǵa artty. Ósim — 9 paıyz. Máselen, qala turǵyndary 10,6%-ǵa, al aýyldyqtar qatary 7%-ǵa ósip otyr. Byltyrǵy 11 aıda 15 156 sábı dúnıege keldi. Onyń ishinde 7892 ul, 7264 qyz bar. Turǵyndardyń tabıǵı ósimi 12 myń 20 adam boldy. Ótken jyly 3 980 neke qııý, 396 nekeni buzý týraly akt jazbasy tirkeldi», - dep habarlady Nurjan Qumarǵalıev.

Onyń málimetinshe, oblystan 27 myń 953 adam kóship ketken. Máselen, syrtqy kóshi-qon boıynsha 121 adam, onyń ishinde TMD elderine 74, álemniń basqa elderine 47 adam qonys aýdarǵan.

«Atyraý oblysyna ózge óńirlerden kóship kelgender sany — 26 myń 34 adam. Onyń ishinde syrtqy kóshi-qon boıynsha kelgen 562 adam, naqtylaı aıtqanda, TMD elderinen – 533, al álemniń basqa memleketterinen 29 adam kóship keldi. Al Qazaqstannyń basqa óńirlerinen 6 441 adam Atyraý óńirine qonys aýdardy. Máselen, Aqtóbe oblysynan kóship kelgender sany — 18,9, Astanadan 16,6, Mańǵystaý oblysynan kelgender 15,8 paıyz», - dep málim etti Nurjan Qumarǵalıev.

Eske sala ketelik, buǵan deıin byltyr Atyraý oblysyna shetelden 272 etnıkalyq qazaq kóship kelgenin habarlaǵan edik.