Atyraý oblysynda turǵyn úıdegi órtten anasy men uly kóz jumǵan
ATYRAÝ. KAZINFORM – Atyraý oblysynyń Reseımen shekaralas Qurmanǵazy aýdanynda turǵyn úıdegi órtten anasy men uly mert bolǵan. Al, qoly kúıgen ákesi men tútinge ýlanǵan qyzy aýrýhanaǵa túsken.
Atyraý oblystyq tótenshe jaǵdaılar departamentiniń qoǵammen baılanys tobynyń málimetine súıensek, turǵyn úıdegi órt 5 qarashada bolǵan. Biraq, nege ekeni belgisiz, bul oqıǵa týraly tek búgin, 11 qarashada aqparat taratyldy.
«Tańǵy saǵat 04:30-da Qurmanǵazy aýdanyndaǵy Aqkól aýylynyń Sh.Ýalıhanov kóshesinde ornalasqan turǵyn úıden órt shyqqany týraly shaqyrtý tústi. Qutqarýshylar shaqyrtý ornyna jetken kezde jeke turǵyn úıge japsarlas salynǵan aýdany ýaqytsha turaqtyń janyp jatqany anyqtaldy. Onyń aýdany – 72 sharshy metr. Órt sóndirý bólimshesiniń qutqarýshylary oqıǵa ornynda barlaý júrgizip, 1958 jylǵy áıel men 1989 jylǵy er adamnyń múrdesin taýyp shyǵardy. Al, qolynan kúıik alǵan 1956 jylǵy er adam men 2019 jylǵy qyz tútinge ýlaný belgisimen aýrýhanaǵa jatqyzyldy», -dep habarlady departamenttiń qoǵammen baılanys toby.
Órt tańǵy saǵat 5:52-de oqshaýlanyp, saǵat 6:30-da tolyqtaı joıylǵan. Jalynnyń tutaný sebebi anyqtalyp jatyr.
«Turǵyn úıdegi órtti sóndirýge Qurmanǵazy aýdanyndaǵy №7 órt sóndirý bóliminiń 9 qyzmetkeri men 2 tehnıka, «GRWORLD» JShS-dan 3 adam, 1 tehnıka jumyldyryldy.
Qoǵammen baılanys tobyn órtten kóz jumǵan eki adam – anasy men uly ekenin rastady.
Eske sala ketelik, buǵan deıin Atyraýda saýda ortalyǵyndaǵy órt elektr jelisiniń qysqa tuıyqtalýynan tutanǵanyn jazǵan edik.
