Atyraý oblysynda tórt Mádenıet úıiniń qurylysy aıaqtaldy
ATYRAÝ. KAZINFORM – Atyraý oblysy Qurmanǵazy aýdanynda aýyldyq eldi mekenderdiń mádenı ınfraqurylymyn damytý maqsatynda tórt jańa mádenıet úıiniń qurylysy aıaqtalyp, bıyl paıdalanýǵa beriledi, dep habarlaıdy Óńirlik kommýnıkatsııalar qyzmeti.
Bókeıhan aýyldyq okrýginiń Bókeıhan aýylynda 300 oryndyq Mádenıet úıi salyndy. Qurylysy 2023 jyly bastalyp, byltyr aıaqtalǵan nysanda kórermender zaly, bı jáne drama úıirmelerine arnalǵan bólmeler, ártisterge arnalǵan bólme, grım jáne kostıým bólmeleri, kitaphana, ákimshilik kabınetter men as úı qarastyrylǵan. Sondaı-aq Teńiz aýylynda 126 oryndyq mádenıet úıi byltyr salyndy.
— Aýyldyq eldi mekenderde mádenı ınfraqurylymdy damytý – negizgi mindetterimizdiń biri. Jańa mádenıet úıleri aýyl turǵyndarynyń mádenı ómirin jandandyryp, jastardyń shyǵarmashylyq qabiletin damytýǵa múmkindik beredi. Qazir aýdanda Birlik jáne Kóptoǵaı aýyldarynda 300 oryndyq eki Mádenıet úıiniń qurylysy júrgizilip jatyr. Aldaǵy ýaqytta da aýyldardaǵy mádenı nysandardy jańǵyrtý jumystary jalǵasady, — dedi Qurmanǵazy aýdany qurylys bóliminiń basshysy mindetin atqarýshy Muratbek Muhıtov.
Dyńǵyzyl aýyldyq okrýginiń Ǵızat Álipov aýylynda 100 oryndyq Mádenıet úıi salynyp, bıyl paıdalanýǵa berildi. Al Asan aýyldyq okrýginiń Asan aýylynda taǵy bir 100 oryndyq Mádenıet úıiniń qurylysy 2024–2025 jyldary júrgizilip, aıaqtaldy.
