Atyraý oblysynda taǵy bir jasóspirim sýǵa batyp ketti

ATYRAÝ. KAZINFORM — Atyraý oblysynda taǵy bir jasóspirim Sharon ózenine batyp ketti.

Atyraý oblystyq tótenshe jaǵdaılar departamenti qoǵammen baılanys tobynyń málimetine súıensek, oqıǵa keshe, 1 tamyzda Qurmanǵazy aýdanynda bolǵan. 

«Keshe saǵat 18:10 shamasynda H.Dospanova aýylynda 1 jasóspirimniń Sharon ózenine batyp ketkeni týraly habar tústi. Sýǵa batqan 2010 jylǵy jasóspirim ekeni anyqtaldy. Osyǵan baılanysty Qurmanǵazy tótenshe jaǵdaılar jáne polıtsııa bólimderiniń qyzmetkerleri, aýyl turǵyndary izdestirý jumysyn júrgizdi. Búgin, 2 tamyzda jedel-qutqarý jasaǵynyń súńgýirleri sý astynan izdestirý jumystaryn júrgizýdi qaıta bastady. Tańǵy saǵat 07:22-de jasóspirimniń múrdesin 4 metr tereńdikten taýyp, ózen jaǵasyna shyǵardy», -dep habarlady departamenttiń qoǵammen baılanys toby. 

Іzdestirý jumysyna tótenshe jaǵdaılar departamentiniń 11 qutqarshysy, 1 júzý quraly, 3 tehnıka tartylǵan. 

Eske sala ketelik, buǵan deıin Atyraý oblysynda jaz bastalǵaly sýǵa ketken 9 adamnyń tórteýi — bala ekenin jazǵan edik. 

Al, 20 shildede Atyraýda eki jasóspirim, úsh kúnnen soń taǵy ekeýi Jaıyqqa batyp jantásilim etti. 

Keshe Atyraýda bir otbasynyń eki balasy Jaıyqqa batyp ketkenin habarlaǵan bolatynbyz.