Atyraý oblysynda suıytylǵan gaz tapshylyǵy neden týyndady

Atyraý oblysyna suıytylǵan gaz Aqtóbeden jetkiziledi. Bul jaǵdaı Atyraý munaı óńdeý zaýytyndaǵy josparly tekserýge baılanysty týyndap otyr, dep habarlaıdy QazAqparat tilshisi.

Atyraý júrgizýshileri birneshe kúnnen beri kólikke gaz quıý qıyndaǵanyn aıtyp jatyr. Avtokólikter gaz quıý stansasynda saǵattap kezekte turǵan.

Osyǵan baılanysty oblystyq energetıka jáne turǵyn úı-kommýnaldyq sharýashylyq basqarmasy túsinik berdi.

– Atyraý munaı óńdeý zaýytynyń tehnologııalaryna 1 qazannan beri josparly tekserý júrgizilip jatyr. Sol sebepten, Energetıka mınıstrliginiń jetkizý kestesine sáıkes Atyraý oblysynyń ishki naryǵyna qazan aıyna «SNPS-Aqtóbemunaıgaz» AQ-dan 5263 tonna suıytylǵan gaz bólindi. Bólingen kólem temirjol arqyly tasymaldanady. Qazir gazben jabdyqtaý mekemeleri tıisti qujattardy resimdedi. Alǵashqy 11 temirjol tsısternasymen 396 tonna suıytylǵan gaz 7-8 qazan aralyǵynda jetkiziledi. Gazdyń qalǵan bóligi kestege sáıkes tasymaldaý kózdelip otyr, - dep habarlady oblystyq basqarmadan.

Atyraý munaı óńdeý zaýyty qoǵammen baılanys bóliminiń málimetinshe, josparly tekserý qarashaǵa deıin sozylady.

– Tekserý jumystary bastalǵanǵa deıin zaýyt rezervýarlarynda munaı ónimderiniń qory jınaqtaldy. Rezerýarlarda 36 myń tonna avtobenzın, 32 myń tonna dızel otyny, 7,4 myń tonna áýe otyny bar. Qazan aıynda qosymsha 16 myń tonna avtobenzın, 28 myń tonna dızel otynyn óndirý josparda bar, - dep málim etti qoǵammen baılanys bólimi.

Eske sala ketelik, budan buryn Atyraý munaı óńdeý zaýytynyń jumysy 1 qazanda toqtatylatynyn habarlaǵan bolatynbyz.