Atyraý oblysynda sýǵa shomylý maýsymy qashan bastalatyny belgili boldy

ATYRAÝ. KAZINFORM – Atyraý oblysynda sýǵa shomylý kezeńi maýsymnyń úshinshi onkúndiginde bastalady. 

Atyraý oblystyq tótenshe jaǵdaılar departamenti azamattyq qorǵanys basqarmasynyń bastyǵy Baqyt Ablanovtyń aıtýynsha, tabıǵı sıpattaǵy tótenshe jaǵdaıǵa baılanysty osyndaı sheshim qabyldanǵan.

«Atyraý oblysynda sý tasqyny áli tolyq aıaqtalǵan joq. Jaıyq ózenine mol sý keldi. Soǵan baılanysty jaıylmaǵa sý kóp shyqty. Bul úlken qaýip týyndatyp otyr. Sebebi, sýdyń túbinde shuńqyrlar, aǵashtyń butaqtary, ótkir zattar men turmystyq qoqystar bar. Sý aıdyndary áli tunǵan joq. Sý laılanyp tur. Mundaı jaıt shomylǵysy kelgen adamǵa óte qaýipti ekenin eskertemiz», - dedi Baqyt Ablanov.

Onyń aıtýyna qaraǵanda, shomylý maýsymyna ruqsat berý úshin sý aıdyndarynyń akvatorııasy zerttelip, túbi tazartylýy qajet. Shomylý maýsymy sodan soń ǵana ashylady.

«Bıyl shomylý maýsymy ádettegi merzimnen kesh bastalady. Sý tasqyny tolastamaýyna jáne oqys oqıǵanyń aldyn alýǵa baılanysty maýsymnyń úshinshi onkúndigine yǵystyryldy», - dep málim etti Baqyt Ablanov. 

Eske sala ketelik, buǵan deıin Atyraýda oblysynda iz-túzsiz joǵalǵan eki jigittiń múrdesi tabylǵanyn habarlaǵan edik.