Atyraý oblysynda sýǵa batqan 13 adamnyń 8-i — kámeletke tolmaǵan jasóspirim
ATYRAÝ. KAZINFORM — Atyraý oblysynyń sý aıdyndarynda jyl basynan beri 13 adam jantásilim etken. Onyń ishinde kámeletke tolmaǵan 8 jasóspirim bar.
Atyraý oblystyq tótenshe jaǵdaılar departamentti azamattyq qorǵanys basqarmasynyń aǵa ofıtseri Ardaq Ótenovtiń aıtýynsha, jyl basynan beri sýdaǵy qaýipsizdik erejelerin buzýǵa baılanysty 492 hattama toltyrylǵan.
«Atyraý oblysynyń aýmaǵynda shomylýǵa tyıym salynǵan 70 qaýipti ýchaske bar. Atalǵan oryndarda eskertý maqsatynda 266 tyıym salý belgisi men 12 aqparattyq stend ornatyldy. Alaıda, turǵyndar mundaı eskertýlerdi elemeıdi. Sonyń saldarynan jyl basynan beri 13 adam sý aıdyndaryna batyp ketti. Onyń ishinde kámelet jasyna tolmaǵan 8 jasóspirim bolǵany anyqtaldy. Al, sýdaǵy qaýipsizdik erejelerin buzǵandarǵa 3,5 mln teń aıyppul salyndy», — dep habarlady Ardaq Ótenov.
Departament ókiliniń pikirinshe, sý aıdyndarynda muz qatqan kezde saq bolý qajet. Óıtkeni, óńirde jeltoqsan aıynyń birinshi jáne ekinshi onkúndiginde muz qata bastaıdy.
«Muz ústinen balyq aýlaý, ótý kezinde qaýipsizdik erejesine basa mán bergen jón. Sý aıdyndaryndaǵy muzdyń qalyńdyǵy 25 santımetrden juqa bolsa, balyq aýlaýǵa, muz betimen júrýge tyıym salynady», — dep málim etti Ardaq Ótenov.
Onyń deregine súıensek, bıylǵy qańtarda eki adam balyq aýlaý úshin kólikpen Atyraý qalasynyń mańyndaǵy Jumysker eldi mekeniniń tusynda muz ústine shyqqan. Sol kezde muz oıylǵan. Kóliktegi eki adamnyń biri óz kúshimen shyqqan. Oqıǵa ornyna jetken súńgýirler sýǵa batqan ekinshi balyqshynyń múrdesin bir saǵattan keıin tapty.
«Jaıyq ózeninan balyq aýlaıtyn áýesqoı balyqshylarǵa qaýipsizdik erejesin saqtaýdy eskertemiz. Erejege sáıkes balyq aýlaýǵa barǵanda qutqarý keýdeshesi, uzyn jip, 2 metrden aspaıtyn taıaq, paketke oralǵan uıaly telefon sekildi jabdyqtardy ala barýy qajet», — deıdi Ardaq Ótenov.
Eske sala ketelik, buǵan deıin Atyraý oblysynda jyl basynan beri 12 adam sýǵa ketkenin jazǵan edik.