Atyraý oblysynda sý tasqynyna baılanysty 190-nan astam qabyldaý beketi daıyndaldy

ATYRAÝ. KAZINFORM – Atyraý oblysynyń ákimdigi sý tasqynyna baılanysty 190-nan astam qabyldaý beketin daıyndady.

Atyraý oblystyq Tótenshe jaǵdaılar departamentiniń bastyǵy Nurlan Jańabaevtyń málimetine súıensek, 31 gıdrotehnıkalyq nysan bar. Onyń ishinde respýlıkalyq menshiktegi 1 sý toraby men 12 magıstraldy kanal bar. Al, kommýnaldyq menshiktiń ıeligine 10 bóget pen 8 magıstraldy kanal alynǵan.

«Bıyl kóktemgi sý tasqynyna tosqaýyl qoıý úshin jergilikti bıýdjetten 2,4 mlrd teńge bólingen. Bul qarjynyń 1,4 mlrd teńgesi tótenshe rezerv qoryn qurasa, 1 mlrd teńge shuǵyl shyǵystarǵa jumsalady. Sý tasqynynyń zardaptaryn joıýǵa 17 tonna janar-jaǵarmaı, 485 tonna ınertti materıal, 25 myńnan astam qap, 69 shatyr, 5 myń kereýet pen tósek-oryn jabdyǵy, 190-nan astam qabyldaý beketi daıyndaldy», - dedi Nurlan Jańabaev.

Onyń aıtýynsha, sý tasqynymen kúreske 1 153 adam tartylýy múmkin. Sondaı-aq, 303 tehnıka, 16 júzý quraly men 107 motopompa daıyn tur.

Eske sala ketelik, buǵan deıin Atyraý oblysynyń qansha eldi mekenine tasqyn sý qaýpi tónetinin habarlaǵan bolatynbyz.