Atyraý oblysynda sý tasqyny kezinde 26 myńnan astam adam evakýatsııalandy

ATYRAÝ. KAZINFORM – Atyraý oblysynda 1 sáýirden beri tasqyn sý qaýpinen 26 467 adam evakýatsııalandy. Onyń ishinde 5 976 bala bar.

Atyraý oblystyq Tótenshe jaǵdaılar departamenti qoǵammen baılanys tobynyń málimetine súıensek, Qulsary qalasynda 2 810 turǵyn úı jáne ınfraqurylymdardy sý basqan.

«Qazir Jylyoı aýdanynyń ortalyǵy – Qulsary qalasynda tasyqan sýdan qorǵaıtyn bógetti nyǵaıtý jumysy jalǵasyp jatyr. Oǵan jergilikti atqarýshy organnan 1 135-ge jýyq, tótenshe jaǵdaılar, polıtsııa departamentteriniń, áskerı bólim qyzmetkerleri, 4640 eriktiler men turǵyndar jumylǵan. Bul jumysqa 204 tehnıka, 6 júzý quraly, 4 motopompa tartylǵan. Tasqyn sýǵa qarsy qum toltyrylǵan 46 352 qap, 174 372 tonna ınertti materıal tóseldi», - dep habarlady departamenttiń qoǵammen baılanys toby.

Qulsary qalasyna kómekke Mańǵystaý, Almaty, Aqtóbe oblystary tótenshe jaǵdaılar departamentterinen 130 qyzmetkeri 8 tehnıka, 11 júzý quraly jáne 17 motopompamen kómekke kelgen.

«Atyraý oblysynda 1-6 sáýir aralyǵynda tasqyn sý qaýpinen 26 467 turǵyn evakýatsııalandy. Onyń ishinde 5976 bala bar. Evakýatsııalanǵan turǵyndar qabyldaý pýnkterine ornalastyryldy», - dep málim etti departamenttiń qoǵammen baılanys tobynan.

Eske sala ketelik, budan buryn tasqyn sý Qulsary qalasyna kire bastaǵanyn habarlaǵan bolatynbyz.

Atyraýdaǵy Qulsary qalasynan 12 myńnan astam adam evakýatsııalandy.

Sondaı-aq, Atyraý oblysynda evakýatsııalaý úshin 15 myń oryn daıyndalǵanyn jazǵan edik.