Atyraý oblysynda sý tartylǵan aýmaqtardy dezınfektsııalaý bastaldy

ASTANA. KAZINFORM – Sý tasqynynan keıin Atyraý oblysynda 2,8 myń otbasy birjolǵy tólem aldy. Bul týraly Atyraý oblysy ákimdiginiń baspasóz hatshysy Rýslan Jumaǵazıev aıtty.

«Jyloı aýdany Qulsary qalasynda qalpyna keltirý jumystary jalǵasyp jatyr.Tótenshe jaǵdaılar departamenti men jergilikti atqarýshy organdar sý basqan jerdi qurǵatýdy turaqty túrde iske asyryp otyr. Sondaı-aq, sýy tartylǵan aýmaqtarda dezınfektsııalaý jumystary bastaldy. 20 sáýirdegi jaǵdaı boıynsha 21 nysan dezınfektsııalandy», - dedi R. Jumanǵazın Ortalyq kommýnıkatsııalar qyzmetinde. 

Onyń aıtýynsha, sý tasqynynan keıin birqatar nysan elektr energııasy jelisine jáne gaz júıesine qaıta qosylyp jatyr. 

«Birjolǵy materıaldyq kómekti tóleýge qatysty 3398 ótinish qabyldanyp, qazir 2796 otbasy tólemin aldy. Shyǵyndy eseptý jáne óteý boıynsha komıssııa jumysyn jalǵastyryp jatyr. Jalpy, Atyraý oblysy boıynsha jaǵalaýdy bekitý jumystaryna 18 myńǵa jýyq adam men 1,7 myń tehnıka jumyldyrylǵan», - dedi baspasóz hatshysy. 

Aıta keteıik, jaqynda Qulsarydaǵy ortalyq aýdandyq aýrýhananyń jumysy qaıta jandandy.