Atyraý oblysynda shomylý maýsymy qashan ashylatyny belgisiz
ATYRAÝ. KAZINFORM – Atyraý oblysynyń turǵyndaryna ózen-kólderdegi 46 orynda sýǵa túsýge ruqsat berilgen. Alaıda jaǵajaılar daıyn bolmaı shyqty.

Atyraý oblystyq Tótenshe jaǵdaılar departamentiniń ımıdjdik jumys jáne syrtqy kommýnıkatsııalar tobynyń málimetine qaraǵanda, 41 orynda shomylý maýsymyn ashý belgisiz merzimge keıinge shegerilgen.
– Qazir oblys aýmaǵyndaǵy sý aıdyndarynda 70 qaýipti oryn anyqtalyp otyr. Soǵan baılanysty qaýipsizdik sharalaryn kúsheıtý maqsatynda tótenshe jaǵdaılar departamentiniń qyzmetkerleri jergilikti atqarýshy organdarmen birge sý aıdyndaryna 266 tyıym salý belgisin, 12 aqparattyq stend ornatyldy. Sý aıdyndaryn shomylýǵa daıyndaý, qaýipsizdik talaptaryna sáıkestigin tekserý jumysy júrgizilip jatyr. Kún saıynǵy reıdtik is-sharalar kezinde birqatar quqyq buzýshylyq anyqtaldy. Ásirese, ózen-kólderdiń shomylýǵa arnalmaǵan ári jabdyqtalmaǵan tusynda sýǵa túsý faktileri jıi tirkeledi. Onyń ishinde balalar eresekterdiń qadaǵalaýynsyz jıi shomylady, -deıdi oblystyq departamenttiń basqarmasy bastyǵynyń mindetin ýaqytsha atqarýshy Daryn Ánýarbekov.
Onyń deregine qaraǵanda, sýǵa túsýge baılanysty qaýipsizdik erejelerin buzǵan 44 adamǵa QR Ákimshilik quqyqbuzýshylyq týraly kodekstiń 412-babymen 600 myń teńgeden astam aıyppul salynǵan. Jyl basynan beri 4 adam sýǵa batqan. Jantásilim etkenderdiń arasynda 1 bala bar.
Eske sala ketelik, buǵan deıin Atyraýda 5 jaǵajaıdyń 3-eýi 10 jylǵa senimgerlik basqarýǵa berilgenin habarlaǵan edik.