Atyraý oblysynda sharýa qojalyǵynyń jumysshysyna qasqyr shapty
ATYRAÝ. KAZINFORM – Atyraý oblysynda sharýa qojalyǵynyń jumysshysyna qasqyr shaýyp, qolyn tistep alǵan. Er adam qolynan jaraqattanǵan.
Oqıǵa keshe, 19 jeltoqsanda Inder aýdanyndaǵy Eltaı aýyldyq okrýginiń aýmaǵynda ornalasqan Kóktóbe qystaǵynda bolǵan. Munda «Bekzat» sharýa qojalyǵynyń malshylary qonystanǵan.
Aýyldyq okrýg veterınary Amantaı Muqatovtyń deregine súıensek, qojalyq jumysshysy Bolat Sarıev malǵa shóp salý úshin aýlaǵa kirgen. Sol kezde oǵan túz taǵysy shapqan.
– Qasqyr Bolat Sarıevtiń qolyn tistep alǵan. Onyń qolynda qasqyr tisiniń izi bar. Ol qasqyrmen alysqan sátte inisi Amanjol dereý jetken. Ekeýi qasqyrdy uryp óltirgen, -dedi Amantaı Muqatov.
Veterınardyń aıtýynsha, qasqyrdyń basy oblystyq veterınarlyq zerthana tapsyrylǵan. Al óleksesi sanıtarlyq talapqa saı órtelip, keıin kómilgen.
Túz taǵysy tistegen Bolat Sarıev aýdan ortalyǵy – Inderbor kentindegi aýrýhanada ambýlatorııalyq em qabyldap jatyr.
Jaraqat alǵan Bolat Sarıevtiń balasy áleýmettik jelide qasqyr túsirilgen vıdeony júktedi.
Onyń aıtýyna qaraǵanda, eki-úsh kún buryn dál osyndaı oqıǵa Yntymaq aýylynda da bolǵan.
Eske sala ketelik, budan buryn jyl basynda Atyraýdaǵy aýyl mańynda qasqyr júrgenin habarlaǵan bolatynbyz.