Atyraý oblysynda irgetasy jarylǵan úsh qabatty úılerdiń taǵdyry kópti alańdatty
ATYRAÝ.KAZINFORM – Atyraý oblysy Isataı aýdanynda qurylysy 2019 jyly bastalǵan kópqabatty turǵyn úılerdiń taǵdyryna bılik áli núkte qoıǵan joq. Aýdan ortalyǵynda salynyp jatqan 60 páterli úsh úıdiń irgetasynan aqaý anyqtalǵan. Alaıda kúni búginge deıin nysandardyń qurylysy jalǵasatyny nemese buzylatyny belgisiz.
Osydan eki jyl buryn oblys ákimi Serik Shápkenov úılerdiń jaǵdaıyn kózben kórgen edi. Sol kezde óńir bıligi qurylys basqarmasy ǵylymı zertteý ınstıtýtynyń mamandarymen birge úıdiń irgetasyn saqtap qalýdyń jańa tehnologııalyq sheshimin taýyp, bastapqy jobaǵa ózgerister engizdi. Qurylys keler jyldyń basynda qaıta qarqyn alatynyn málimdegen. Degenmen qurylys jandanbady.
Úsh turǵyn úıdiń bireýi aıaqtalýǵa jaqyn, alaıda ınjenerlik ınfraqurylym júrgizilmegen. Al ekinshi úıdiń tóbesi jabyldy, úshinshi úıdiń qurylysy úshinshi qabaty salyna kelgende toqtady. Isataı aýdanynyń ákimi Nurym Mýsın bul úılerdiń qazirgi jaǵdaıyna qazaq qurylys, ǵylymı-zertteý jáne jobalaý ınstıtýtynyń mamandary kásibı turǵydan baǵalaý jumysyna kiristi deıdi.
- Aýdandyq ákimdiktiń tarapynan Almatydaǵy qurylys salasyndaǵy memlekettik ǵylymı-zertteý jáne jobalaý ınstıtýtynyń ókilderin shaqyrdyq. Qańtar aıynda kelgen mamandar naýryz aıyna deıin tolyq zerdeleý jumystaryn júrgizedi. Qorytyndysyna sáıkes naqty sheshim qabyldanady, - dedi aýdan ákimi Nurym Mýsın.
Bastapqyda bul úılerdi 2023 jyly paıdalanýǵa berý josparlanǵan. Alaıda 2020-2021 jyly jumys merdiger tarapynan toqtap qalǵan. 2022 jyly jandanǵanmen, 2024 jyly irgetasynda jaryqtar paıda bolǵan. Bir anyǵy, ákimdik pen úsh nysannyń qurylysyna jaýapty merdiger mekeme arasyndaǵy kelisimshart buzylǵan. Jalpy joba quny 3 mlrd teńge.
Aýdan ákiminiń aıtýynsha, búginde Aqqystaý aýylynda munaı-gaz kompanııasynyń demeýshiligimen salynǵan 60 páterli úıdiń qurylysy aıaqtalǵan. Osyndaı taǵy bir kópqabatty úı jergilikti bıýdjettiń qarjysyna salynyp jatyr.
Buǵan deıin Atyraý qalasynda osydan 6 jyl buryn paıdalanýǵa berilgen baspanalar turýǵa jaramsyz ekenin jazǵan edik.