Atyraý oblysynda referendýmda daýys beretin turǵyndar sany kóbeıdi
ATYRAÝ. KAZINFORM – Atyraý oblysynda referendýmda daýys beretin quqyǵy bar turǵyndar sany kóbeıdi. Bir aı buryn 391 937 azamat tirkelgen edi. Qazir 411 myń 880 adamǵa jetti.
Atyraý oblystyq aýmaqtyq referendým komıssııasynyń málimetine súıensek, 6 qazanda 9 aýmaqtyq referendým komıssııasy jumys isteıdi. Bul komıssııalarda 63 múshe bar.
«Atyraý oblysynda 274 referendým ýchaskesi quryldy. Onyń ishinde 11 ýchaske azamattardyń ýaqytsha bolý oryndarynda jumys isteıdi. Emdeý mekemelerinde 9, tergeý ızolıatory men áskerı bólimshe bir-birden osyndaı ýchaske bolady. Respýblıkalyq referendýmǵa qatysýǵa quqyǵy bar 411 myń 880 azamat tirkeldi. Birkelki nysanda azamattarǵa habarlandyrý berilip, olardyń mekenjaılaryna taratyldy. Daýys berý orny men ýaqyty týraly aqparattar, azamattardyń óz ýchaskelerin izdeý jónindegi qyzmetter komıssııalardyń atyrau.gov.kz ınternet-betshesinde ornalastyryldy. Azamattar ózderiniń JSN engizip, Telegrambot @sailauAtyrauBot qosymshasynan qaı ýchaskede daýys beretinin bile alady», - dep habarlady oblystyq aýmaqtyq referendým komıssııasynan.
Referendým ótkizýdi uıymdastyrý kezeńinde barlyq ýchaske materıaldyq-tehnıkalyq qural-jabdyqtarmen qamtamasyz etilgen. Al, múmkindigi shekteýli azamattardyń daýys berýine qolaıly jaǵdaı jasaý qosymsha sharalar qabyldanǵan.
«Barlyq ýchaske taktıldik belgiler, kóz janarynda aqaýy bar azamattarǵa aýdıonusqany tyńdaǵannan keıin ózi bıýlletendi toltyrý úshin trafarettermen qamtamasyz etilgen. Atyraý qalasy men aýdandarda 94 ınvataksı qyzmeti uıymdastyrylady. Áleýmettik qorǵaý organdary arqyly 15 sýrdoaýdarmashylardy tartý kózdeldi. Vahtalyq ádispen jumys isteıtin azamattardyń daýys berýin uıymdastyrý sharalary qabyldandy. Bul jumystarǵa 38 ýchaskelik komıssııa tartyldy. Azamattardy tirkeý orny boıynsha málimetterin tekserý jáne referendým ýchaskeleriniń mekenjaıy boıynsha azamattardy tirkeý baǵytynda eki onlaın-servıs ázirlendi. Tizimnen ózderin taba almaǵan, biraq referendým ýchaskesiniń shekarasynda turatyn azamattar daýys berý kúni tirkeý mekenjaıyn ózi tekseretin ýchaskelik komıssııaǵa júginýge múmkindigi bolady. Turǵylyqty jeri rastalǵan jaǵdaıda azamat tizimge engiziledi. Mundaı qyzmetter barlyǵy 181 ýchaskede qoljetimdi bolady», - dep málim etti oblystyq aýmaqtyq referendým komıssııasynan.
Al, tirkeýi joq jáne osy sebepten eshbir ýchaskede tizimge enbegen azamattardyń daýys berý kúni referendým ýchaskesinde tirkelip, daýys berýge múmkindik jasalyp otyr. Atyraý qalasynda osyndaı 5 ýchaske bar.
«Komıssııa múshelerine arnalǵan oqytýǵa semınarlarǵa 2037 referendým komıssııasynyń músheleri qatysty. Respýblıkalyq referendýmdy baıqaý úshin 7 uıym akkredıtteldi. Olardyń tizimi komıssııanyń ınternet-resýrsynda ornalastyryldy. Atyraý qalasyndaǵy №5546 áskerı bólimindegi №75 referendým ýchaskesinde daýys berý saǵat 06:00-de bastalady», - dedi oblystyq aýmaqtyq referendým komıssııasynan.
Eske sala ketelik, buǵan deıin Atyraý oblysynda referendýmǵa qatysýǵa quqyǵy bar 391 937 azamat tirkelgenin jazǵan edik.
