Atyraý oblysynda polıtseılerdiń kómegimen taǵy bir sábı ómirge keldi
ATYRAÝ. KAZINFORM — Atyraý oblysynyń Jylyoı aýdanynda patrýldik polıtsııa qyzmetkerleri tolǵaǵy qysqan júkti áıeldi perzenthanaǵa der kezinde jetkizýge kómektesti.
Polisia.kz málimetinshe, oqıǵa 16 maýsym kúni jol qozǵalysy qarqyndy bolyp, kólik keptelisi qalyptasqan ýaqytta bolǵan. Kepteliste turǵan júrgizýshi patrýldik polıtsııa qyzmetkerlerinen kómek surap, kólikte tolǵaǵy qysqan jubaıynyń otyrǵanyn habarlaǵan.
Jaǵdaıdyń shuǵyl ekenin eskergen polıtsııa qyzmetkerleri Ilıas Ablaev pen Rınat Naýryzuly qyzmettik avtokólikpen súıemeldeý uıymdastyryp, áıeldi perzenthanaǵa jedel jetkizdi.
— Dárigerlerdiń baqylaýyna alynǵan áıel kóp uzamaı aman-esen bosanyp, deni saý qyz balany dúnıege ákeldi. Qazirgi ýaqytta ana men náresteniń jaǵdaıy jaqsy, — delingen habarlamada.
Oblystyq polıtsııanyń málimetinshe, jyl basynan beri óńirde júkti áıelderdi perzenthanaǵa shuǵyl jetkizýge baılanysty 17 jaǵdaı tirkelgen. Tártip saqshylarynyń kómegimen osy ýaqyt aralyǵynda 11 qyz jáne 6 ul sábı dúnıege kelgen.
Otbasy músheleri qıyn sátte kómek kórsetken polıtsııa qyzmetkerlerine alǵys bildirdi.
Buǵan deıin SQO-da polıtseıler tolǵaq qysqan áıeldi perınataldyq ortalyqqa jetkizýge kómekteskenin jazdyq.
