Atyraý oblysynda polıtseıler joǵalǵan 70 maldy ıelerine taýyp berdi

ASTANA. KAZINFORM – Atyraý oblysy aýmaǵynda mal urlyǵynyń aldyn alý jáne ashý, olardy jasaýmen aınalysatyn tulǵalardy anyqtaý maqsatynda túrli is-sharalar ótkizilip turady. Atap aıtar bolsaq, bıyl oblysta joǵalǵan 70 mal ıelerine qaıtaryldy. 

Polisia.kz-tiń málimetinshe, jyl basynan beri mal urlyǵyna qatysty polıtseıler 27 qylmysty ashyp, joǵalǵan 70 mal ıelerine tabystalǵan. Júrgizilgen jedel-izdestirý sharalary nátıjesinde mal urlyǵymen aınalysqan 1 qylmystyq top quryqtalyp, 7 adam ustaldy.

Atyraý oblysy polıtsııa departamenti oblys kóleminde mal urlyǵy qylmysynyń aldyn alyp, ashýǵa baǵyttalǵan is-sharalardy júıeli túrde uıymdastyryp keledi.  

Aıta keteıik, mal urlaý, ıaǵnı bótenniń malyn jasyryn jymqyrý – múlki tárkilenip, úsh myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna, ne bes jylǵa deıingi merzimge bas bostandyǵyn shekteýge, ne sol merzimge bas bostandyǵynan aıyrýǵa jazalanady.

Buǵan deıin Batys Qazaqstanda maldy jaıý qaǵıdalaryn buzǵan 2 myńnan astam adamǵa aıyppul salynǵanyn habarlaǵan edik.