Atyraý oblysynda polıtseıler muz astyna túsip ketken eki adamdy qutqardy
Atyraý oblysynda polıtseıler muz astyna túsip ketken áıel men oǵan kómektespek bolǵan er adamdy qutqardy, – dep habarlaıdy Polisia.kz.
25 jeltoqsan kúni saǵat 19:20 shamasynda Qurmanǵazy aýdany Shora ózeni ústinde belgisiz áıel adam muz oıylyp, sýǵa túsip ketkeni jóninde aýdandyq polıtsııa bóliminiń kezekshi bólimshesine habar bergen. Aýdandyq polıtsııa bóliminen saptyq jıynnan tarap kele jatqan polıtsııa qyzmetkerleri tez arada oqıǵa ornyna jetýge baǵyttama alǵan.
Atalǵan habarlamany estigen tárbıe jáne kadr bólimshesiniń ınspektory Roman Nasıhan da ýaqyt ótkizbeı jeke avtokóligimen oqıǵa ornyna jetken. Oqıǵa ornyna birinshi jetken ol avtokólikten arqan jip alyp muz ústine shyqqan. Muz ústine shyqqan kezde kómekke kelgen er adamnyń da muz oıyǵyna túsip ketkenin kórgen.
Sol sátte kómekke patrýldik polıtsııa bóliminiń qyzmetkerleri Artýr Karımov, Nurhat Zulqarov, Ádilbek Temirbolat, Jandos Ibatýllaev, Amandyq Aıdynalıev jáne ýchaskelik polıtsııa ınspektory Darhan Amanǵalıev kómekke kelip, sýǵa ketken áıel adam men ony qutqarýǵa oqtalyp ózi de oıylǵan muz qursaýynda qalǵan er adamdy qutqaryp qalǵan.
Juqa muz ústine bir ýaqytta 10-ǵa jýyq adam shyqqan sátte muz oıyǵy odan ári úlkeıgen. Alaıda aıazdy kúnge qaramastan, áıeldi qutqarmaq bolǵan 1996 jyly týǵan azamat pen 1959 jyly týǵan áıel adamdy jaǵaǵa shyǵaryldy.
Jedel-járdem qyzmetkerleriniń kelýin kútpeı, polıtsııa qyzmetkeri Roman Nasıhan jeke avtokóligimen japa shegýshilerdi aýdandyq aýrýhanaǵa ýaqytyly jetkizgen. Qazirgi tańda 64 jastaǵy áıel adam dárigerdiń baqylaýynda.
