Atyraý oblysynda órttiń 60 paıyzy turǵyn úı sektorynda bolǵan

Atyraý oblysynda jyl basynan beri 212 órt tirkelgen. Órttiń 60 paıyzy turǵyn úı sektorynda bolǵan, dep habarlaıdy Kazinform.   

Atyraý oblystyq tótenshe jaǵdaılar departamenti bastyǵynyń orynbasary, azamattyq qorǵaý polkovnıgi Jasulan Aqtaevtyń málimetinshe, oblys ortalyǵy men 7 aýdanda órt oqıǵasy tirkelip otyr.

«Bıyl oblys aýmaǵynda 212 órt oqıǵasy tirkeldi. Órttiń basym bóligi – 120 derek Atyraý qalasynda anyqtaldy. Al Jylyoı aýdanynda 22, Mahambette – 17, Qurmanǵazyda – 14, Maqatta – 12, Inder men Qyzylqoǵada – 11, Isataı aýdanynda 5 órt boldy. Alaıda byltyrǵy kórsetkishten 12%-ǵa tómendedi», - dedi Jasulan Aqtaev.

Onyń aıtýynsha, jalynnyń tutanýyna birneshe sebep áser etken. Birinshiden, elektr aspaptaryn montajdaý jáne tehnıkalyq paıdalaný erejesi buzylǵan. Ekinshiden, otty jaǵý kezindegi abaısyzdyqtyń sońy órtke ulasqan. Úshinshiden, peshterdi paıdalaný kezinde órt qaýipsizdigi erejeleri durys saqtalmaıdy. Tórtinshiden, kámeletke tolmaǵan balalardyń sirińke sekildi janǵysh zattardy paıdalanýynan týyndap otyr.

«Tirkelgen órt oqıǵasynyń 117 deregi (60%) turǵyn úı sektorynda bolǵany anyqtaldy. Turǵyn úıdegi órttiń kóbeıýi Qurmanǵazy, Maqat jáne Isataı aýdanynda baıqaldy», - dep málim etti Jasulan Aqtaev.

Tótenshe jaǵdaılar deparatmentiniń qyzmetkerleri turǵyndarǵa órt qaýipsizdigi erejeleriniń saqtalýyn túsindirip, turǵyn úıler men jataqhana, hostelderdi tekserdi. Qazir oblysta 23 jataqhana men 47 hostel tirkelgen.

Eske sala ketelik, buǵan deıin Atyraýda jeke turǵyn úı órtenip, 81 jastaǵy qarııany kúıik shalǵanyn jazǵan bolatynbyz.