Atyraý oblysynda ór sýyn jınaıtyn qoıma salynbaq
ATYRAÝ.KAZINFORM - Jylyoı aýdanynyń Araltóbe ýchaskesinde sý qoımasyn salý josparlanyp otyr. Bul taqyryp 2024 jyly aýdanda bolǵan tasqynnan keıin kóterildi. Jem ózeniniń boıynda iske asyrylatyn joba óńirdiń sý resýrstaryn tıimdi basqarýǵa jáne aýyl sharýashylyǵynyń qajettilikterin qamtamasyz etýge baǵyttalǵan.
Joba aıasynda Jem ózeninde syıymdylyǵy 220 mln tekshe metr sý qoımasyn salý boıynsha tehnıkalyq-ekonomıkalyq negizdeme ázirlendi. Qujat Jaıyq-Kaspıı basseındik ınspektsııasyna kelisýge joldandy. Qazirgi ýaqytta jumystardy memlekettik saraptamanyń oń qorytyndysyn alýǵa oblystyq bıýdjettik komıssııadan qarjy bólý qarastyrylyp otyr. Jalpy bul jobaǵa oblystyq tabıǵı resýrstar jáne tabıǵat paıdalanýdy retteý basqarmasy jaýapty. Ony iske asyrý kezeńi 2026-2028 jyldardy qamtıdy.
- Jem ózeninen sýdy jınaqtaıtyn retteletin sý qoımasyn salý aýyl sharýashylyǵy nysandaryn sýarmaly sýmen qamtamasyz etýdi jaqsartýǵa, básekege qabiletti otandyq ónim óndirýge jáne qolda bar sý resýrstaryn utymdy paıdalanýǵa baǵyttalǵan. Jobany iske asyrýdyń tańdalǵan nusqasy tehnıkalyq turǵydan iske asatyn, ekonomıkalyq jaǵynan negizdelgen jáne áleýmettik mańyzy joǵary, - dep málimdedi basqarma.
Basqarmanyń aqparatyna súıensek, eger sý qoımasy salynsa 5 myń gektar sýarmaly jer daıyndaýǵa, Qulsary qalasyna táýligine 31 myńǵa jýyq, Jańa Qaraton kentine kúnine 4400 tekshe metrden asa sý jiberýge múmkindik bolady. Bul joba aýdan aýmaǵynda aýyl sharýashylyǵyn damytýǵa múmkindik beredi deıdi Jumabek Qarajanov.
- Qoıma kelgen sýdy saqtap qalýǵa, kerek kezde sýdy arnaǵa jiberýge bolady. 2020 jylǵa deıin qýańshylyq kezde Uly Jemde múlde sý bolmaǵan. Maldy sýarýǵa, jaıylymǵa sý jiberýge múmkindik bolmady. 2022 jyldan bastap sý kele bastady. Sońǵy 3-4 jylda sý mol keldi. Ótken jyly ózendegi sýdyń deńgeıi maksımaldy 237 santımetrge jetken edi, - dedi Jylyoı aýdanynyń ákimi Jumabek Qarajanov.
Aıta keteıik, bul taqyryp ótken jyly sala mamandarynyń arasynda talqylanǵan edi.
Jýyqta 2030 jylǵa deıin el aýmaǵynda 42 sý qoımasy salynyp, sý jınaý kólemi 2,6 mlrd tekshe metrge artatyny jóninde jazǵan edik.