Atyraý oblysynda oqýshylardy tasymaldaýǵa 28 avtobýs jetispeıdi
ATYRAÝ.KAZINFORM — Atyraý oblysynyń mektepterine oqýshylardy tasymaldaý úshin 28 avtobýs qajet. Kólik tapshylyǵy negizinen aýdandarda baıqalady.
Oblystyq bilim berý basqarmasynyń málimetinshe, Qurmanǵazy, Jylyoı, Inder, Isataı jáne Maqat aýdandarynda mektep avtobýstary jetispeıdi.
Jalpy óńirde 123 mektep avtobýsy bar. 43 avtobýstyń tozyǵy jetken, al 3 avtobýs esepten shyǵarylǵan.
— Máseleni sheshý baǵytynda jumystar júrgizilip jatyr. Bıyl demeýshilik qarajat esebinen 6 avtobýs alyp berý josparlanǵan. Sonymen qatar bıýdjet qarajaty esebinen jańa avtobýstar satyp alý úshin qarjy suratylýda. Eger bul másele máslıhatta oń sheshimin tapsa, mektep avtobýstaryna degen qajettilik tolyqtaı jabylady dep josparlanyp otyr, -dep habarlady oblystyq bilim berý basqarmasy.
Aıta keteıik, búginde oqýshylardy tasıtyn avtobýstarǵa tórt júrgizýshi qajet.
Eske salaıyq, buǵan deıin Atyraýda shatyry órtengen mekteptiń 300-ge jýyq oqýshysy basqa ǵımaratta oqytý týraly sheshim qabyldanǵanyn jazǵan edik.
