Atyraý oblysynda Noǵaıty ózeniniń arnasy kóterilip, taǵy bir aýylda saı tasyp jatyr
ATYRAÝ. KAZINFORM — Atyraý oblysyndaǵy Saǵyz aýyly arqyly ótetin Noǵaıty ózeniniń arnasy kóterildi. Al, Muqyr aýylyndaǵy saı tasyp jatyr. Eki aýyl da Qyzylqoǵa aýdanynda ornalasqan.
Atyraý oblystyq tótenshe jaǵdaılar departamenti qoǵammen baılanys tobynyń málimetinshe, buǵan keshe, 8 aqpandaǵy jaýyn-shashyn sebep bolǵan.
«Keshe, 8 aqpanda Qyzylqoǵa aýdanyndaǵy Mııaly, Saǵyz aýyldaryna sý basý qaýpi tónetini anyqtaldy. Mııaly aýylyndaǵy kóshelerdiń sý basýy múmkin tusynan qar shyǵaryldy. Al, Aqtóbe oblysynda qar mólsheriniń kóptiginen Noǵaıty ózeni arnasynyń tasý qaýpi tóngen bolatyn. Osyǵan baılanysty Saǵyz aýylyndaǵy ózen jaǵasy bekitilip, N.Abdýllın kóshesi boıynda ornalasqan turǵyn úı tusyna qosymsha topyraq tóseldi. Ózen jaǵalaýy bekitildi», - dep habarlady departamenttiń qoǵammen baılanys toby.
Búgin 9 aqpanǵa qaraǵan túnde qar jaýyp, jaýyn-shashyn bolǵan. Sonyń saldarynan Noǵaıty ózeniniń arnasy kóterilip jatyr.
«Qazir Saǵyz aýyldyq okrýginde sý qaýpinen qorǵaý jumysy qolǵa alyndy. Oǵan №12 órt sóndirý bóliminen 7 adam, 1 motopompa, jergilikti atqarýshy organnan 8 adam, 1 vakýým, 1 motopompa, 1 júk tıegish tehnıka tartyldy», - dep málim etti departamenttiń qoǵammen baılanys bóliminen.
Al, Muqyr aýyldyq okrýginiń ákimi Azamat Jaqsıevtiń aıtýynsha, búgin, 9 aqpanda saıǵa erigen qar sýy quıylǵan.
«Muqyr aýylyndaǵy bul saı jyl saıyn qar erigen kezde tasıdy. Saıǵa jaqyn ornalasqan turǵyn úılerdiń tusyna topyraq tógýge aýyldyń 15 adam, 2 júk kótergish, 1 Gıdromek traktory, 1 KamAZ kógiligi tartyldy», - dep habarlady Azamat Jaqsıev.
Eske sala ketelik, buǵan deıin sınoptıkter Atyraý turǵyndaryna aldaǵy úsh kúnde saq bolýdy eskertkenin jazǵan edik.
