Atyraý oblysynda múgedekterdi jumysqa ornalastyrý kvotasy oryndalmaǵan

ATYRAÝ. KAZINFORM – Atyraý oblysynda múgedekterdi jumysqa ornalastyrý kvotasy tolyq oryndalmaı otyr.

Atyraý oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń mindetin atqarýshy Erkebulan Ábilqasymovtyń málimetinshe, jumys berýshilerden múmkindigi shekteýli jandar úshin vakansııa bólý suralǵan.

«Jyl basynda jumys oryndary boıynsha jospar bekitilip, kvota bólingen edi. Alaıda, ony oryndamaıtyn mekemeler bar. Qazir sondaı kásiporyndardyń tizimi jasaqtalyp prokýratýraǵa, memlekettik eńbek ınspektsııa basqarmasyna joldandy», - deıdi Erkebulan Ábilqasymov.

Onyń aıtýyna qaraǵanda, jyl basynan beri 735 adamǵa áleýmettik qoldaý kórsetilgen. Múmkindigi shekteýli jandarǵa qaıtarymsyz 18 grant berilgen. Sondaı-aq 130 múgedek «Bastaý-Bıznes» jobasymen kásipkerlik kýrsyna jiberilgen. 

«Bıyl jyl basynan beri 219 adam turaqty jumysqa, 290 adam aqyly qoǵamdyq jumysqa ornalasty. Al, 12 túlek jastar tájirıbesine jiberildi. «Kúmis jas» jobasymen egde jastaǵy 30 eńbekker jumysqa ornalasýǵa múmkindik aldy. «Urpaqtar kelisim-sharty», «Alǵashqy jumys orny» jobalarymen 6 jas eńbekke aralasty», - dep málim etti Erkebulan Ábilqasymov.

Eske sala ketedik, budan buryn Atyraýda ruqsatsyz jumys istegen 13 sheteldik 92 myń teńgeden aıyppul tólegenin habarlaǵan edik.