Atyraý oblysynda moped qaqqan jasóspirim aýrýhanada qaıtys boldy

ATYRAÝ. KAZINFORM – Atyraý oblysynda moped júrgizýshisi jasóspirimdi qaǵyp ketti. Zardap shekken jasóspirim aýrýhananyń jansaqtaý bóliminde qaıtys boldy.

Atyraý oblysy polıtsııa departamentiniń baspasóz qyzmetinen málim etkendeı, jol-kólik oqıǵasy 18 mamyrda tirkelgen. 

«Kúndizgi saǵat 15:25 shamasynda Inder aýdanynyń Bódene aýylynda moped kólik quraly jaıaý júrginshini qaǵyp qulatqan. Jol-kólik oqıǵasy saldarynan jaıaý júrginshi Inder aýdandyq ortalyq aýrýhanasynyń jansaqtaý bólimine jetkizildi. Biraq, zardap shekken jasóspirim aýrýhanada qaıtys boldy», - dep habarlady departamenttiń baspasóz qyzmeti. 

Adam ólimine sebepker bolǵan jol-oqıǵasyn jasaǵan moped júrgizýshiniń jasóspirim ekeni anyqtalyp otyr. Bıylǵy naýryz aıynda bul jasóspirimniń osyndaı quqyq buzǵany úshin zańdy ókiline ákimshilik hattama toltyrylǵan. Alaıda, jasóspirim eskertýge qaramastan moped júrgizýdi jalǵastyrǵan. 

Eske sala ketelik, budan buryn Atyraýda jyl basynan beri moped júrgizýshileriniń kinásinen 17 jol oqıǵasy bolǵanyn  habarlaǵan edik.