Atyraý oblysynda Mııaly–Taısoıǵan jolyn qum basyp jatyr
ATYRAÝ. KAZINFORM – Atyraý oblysynda Mııaly – Taısoıǵan baǵytyndaǵy jańa avtojoldy qum basýda. 45,8 shaqyrymdyq joldyń qurylysy aıaqtalyp, jol ashylǵanmen, nysan áli tolyq qabyldanǵan joq. Qumnyń jolǵa jınalýy júrgizýshilerge kedergi keltirip otyr.
Mııaly men Taısoıǵan aýyldaryn jalǵaıtyn joldyń qurylysy 2023 jyldyń kúzinde bastalǵan. Jobanyń bastapqy quny – 14,7 mlrd teńge. Uzyndyǵy 45,8 shaqyrym bolatyn jańa trassa Taısoıǵan turǵyndary úshin mańyzdy kólik qatynasyn qamtamasyz etedi. Buǵan deıin aýdan ortalyǵyna jetýge eki-úsh saǵat ýaqyt ketse, jańa jol bul ýaqytty shamamen 40 mınýtqa deıin qysqartýǵa múmkindik beredi.
Alaıda joldyń negizgi máselesi onyń tabıǵı jaǵdaıyna baılanysty bolyp otyr. Trassa Taısoıǵan qumdarynyń aýmaǵy arqyly ótedi. Bul jerde jeldiń áserinen qum massalarynyń tabıǵı qozǵalysy turaqty júredi. Sonyń saldarynan jańadan tóselgen asfalttyń ústine qum qaıta-qaıta shyǵyp, keı ýchaskelerde joldyń edáýir bóligin basyp, kedergi keltirýde.
Ázirge joldy qumnan tazartý negizgi amal bolyp tur. Al bul uzaq merzimdi sheshim emes. Qum basqan saıyn arnaıy tehnıka tartylyp, jol qaıta tazalanýy kerek.
Oblystyq jolaýshylar kóligi jáne avtomobıl joldary basqarmasy máseleni joqqa shyǵarmaıdy. Basqarmanyń málimetinshe, avtomobıl joly Taısoıǵan qumdarynyń aýmaǵymen ótedi jáne bul jerde jeldiń áserinen qum massalarynyń tabıǵı qozǵalysy qalypty qubylys sanalady. Osyǵan baılanysty joldyń jekelegen ýchaskelerinde qum úıindileri paıda bolady.
Basqarma qazirgi ýaqytta nysandy qabyldaý rásimi júrip jatqanyn habarlady. Bul jumys aıaqtalǵannan keıin jol Qyzylqoǵa aýdany ákimdiginiń balansyna beriledi.
- Qum basý qaýpi bar ýchaskelerde kólik qozǵalysynyń qaýipsizdigin qamtamasyz etý maqsatynda joldy qumnan júıeli túrde tazartý jumysy júrgiziledi. Bul shara qajettilikke qaraı atqarylady jáne aldaǵy ýaqytta jalǵasady. Sonymen qatar Qyzylqoǵa aýdanynyń ákimdigimen birlesip, qum basýdyń saldaryn barynsha azaıtýǵa baǵyttalǵan qosymsha sharalar qarastyrylýda. Onyń ishinde qum massalarynyń erkinirek qozǵalýyn qamtamasyz etý jáne olardyń joldyń júris bóliginde jınalýyna jol bermeý maqsatynda jol ınfraqurylymynyń jekelegen elementterin ózgertý máselesi qaralyp jatyr,-dep jaýap berdi Atyraý oblystyq jolaýshylar kóligi jáne avtomobıl joldary basqarmasy.
Jalpy joba aıasynda bıiktigi 15 sm bolatyn eki qabat asfalt tóselgen. Sondaı-aq jol boıynda tórt jerden mal ótkeli men sý qubyry ornatylǵan.
Buǵan deıin 2026 jyldyń segiz aıynda «QazAvtoJol» UK» AQ-nyń avtomattandyrylǵan ólsheý stantsııalary kólik quraldarynyń ruqsat etilgen salmaǵyna qatysty 870 myńǵa jýyq yqtımal zań buzýshylyqty tirkegenin jazǵan edik.
