Atyraý oblysynda medıtsınalyq qyzmetke shaǵym kóp – Úkimet basshysy

Atyraý oblysynda medıtsınalyq qyzmettiń qoljetimdiligine shaǵym kóp. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Óńirde alǵashqy kómek kórsetetin 18 nysandy jańǵyrtý qajet. Al turǵyndar tarapynan medıtsınalyq qyzmettiń qoljetimdiligi men sapasyna jáne dári-dármekpen qamtamasyz etýge qatysty shaǵym kóp túsedi. Ákimdik qandaı is-sharalar qoldanýda», - dep surady Úkimet basshysy Atyraý oblysynyń ákimi Serik Shápkenovten.

Óńir ákiminiń aıtýynsha, oblys turǵyndarynan densaýlyq saqtaý júıesine qatysty 406 aryz-shaǵym túsken. Taldaý onyń 74-iniń negizdi, 73-i ishinara negizdi ekenin kórsetken. 259-y negizsiz boldy.

«Jıi kezdesetin máselelerdiń biri – mindetti áleýmettik medıtsınalyq saqtandyrý aıasynda kómek ala almaý. Onyń ishinde mynadaı másele bar. Aryzdanýshy jumys jasaıdy. Biraq, jumys berýshi ýaqytynda jarnasyn tólemeıdi. Keıbir jaǵdaıda jumys jasaǵanymen tekserýden ótýge kelgende medıtsınalyq hattamalarǵa baılanysty ondaı dagnostıkanyń kózdelmeýi kezdesedi», - dedi oblys ákimi.

Sonymen qatar ol ekinshi másele retinde dári-dármek problemasyna qatysty mán-jaıdy ashyp aıtty.

«Tegin dári-dármekpen qatar olardyń balamalary bar. Aryzdanýshylar sol balamasyn suraıdy. Biraq, ol tizbege kirmegendikten berilmeıdi. Úshinshi másele portalǵa qatysty. ıAǵnı, dárigerge jazylý ýaqytynyń sozylýy nemese uzaq kútý. Qazirdiń ózinde saqtandyrylmaǵan adamdardyń sany jyldan jylǵa azaıyp keledi. Sebebi negizgi jumysymyzdy osy baǵytta júrgizip jatyrmyz», - dedi Serik Shápkenov.